| |
LSI
në Berat
Ditën
e enjte, më 30 shtator 2004, kreu i LSI-së Ilir
Meta erdhi në Berat. Ai shoqërohej nga deputetët
e Partisë Lëvizja Socialiste për Integrim,
Spartak Braho, Mustafa Muçi, Dritan Prifti, Sabit
Brokaj.
Në orën 16.00 salla e shfaqjeve ishte mbushur
plot me qytetarë të Beratit dhe të rrethinave.
Mjaft simpatizantë të LSI-së qëndronin
në këmbë në galeri dhe pranë
dyerve të sallës. Jashtë skemave të
zakonshme ky takim nuk pati një presidium. Një
nga të pranishmit prezantonte oratorët, të
cilët ngjiteshin në foltore.
Në fillim foli kryetari i LSI-së për degën
e Beratit, kirurgu Eduard Bejko, i cili prezantoi kryesinë
e degës. Binin në sy emrat e mjaft intelektualëve
të njohur si mjekë, ekonomistë, mësues
dhe inxhinierë, si: Eduard Bejko, Neritan Vito, Zana
Ago, Bledar Çili, etj.
Zoti Bejko tha se LSI nuk është parti krahinore
siç na etiketojnë kundërshtarët
tanë, por parti e të rinjve të rejave,
intelektualëve, qytetarëve, të cilët
duan dhe meritojnë një politikë ndryshe
nga ajo e zbatuar nga dy forcat e mëdha politike
gjatë këtyre 12 vjetëve. Këtë
fakt e tregon kjo sallë këtu, ku janë mbledhur
të gjithë ata që besojnë dhe shpresojnë
te LSI-ja.
Pas kryetarit të degës së LSI-së u
ngjit në foltore gjeneral Veli Llaka. Ai e përcaktoi
LSI-në si forcë politike që mbart te vetja
vlerat më të mira të qytetarëve shqiptarë,
ato të luftës antifashiste, vlerat e atyre që
punuan për transformimin e Shqipërisë,
por edhe të atyre që u persekutuan nga Hoxha.
U duartrokit fort këngëtari i njohur beratas
Kozma Dushi, ndërsa u ngjit në skenën e
teatrit, jo për të kënduar, por për
të deklaruar se ai mbështet fort LSI-në
dhe Ilir Metën.
Këngëtai Dushi u bëri thirrje bashkëqytetarëve
të tij të mbështesin LSI-në, si shprehëse
e mbrojtëse e interesave të njerëzve të
thjeshtë.
Përshëndeti edhe Sabit Brokaj, nënkryetar
i LSI-së. Në fund e mori fjalën ish-kryeministri
Ilir Meta, kryetar i Lëvizjes Socialiste për
Integrim. Zoti Meta vuri në dukje se dy partitë
e mëdha PS dhe PD e kryen misionin e tyre. Ato do
të dalin në opozitë në pranverën
e vitit 2005, siç ndodhi edhe në Bullgari,
ku partia e djathtë dhe partitë e majtë,
të cilat patën qeverisur deri para disa vitesh,
dolën në opozitë nga alternativa e Mbretit
Simeon, tani kryeministër i Bullgarisë.
“Në Shqipëri, tha zoti Meta, Partinë
Socialiste dhe Partinë Demokratike nuk do t’i
nxjerrë në opozitë PLI-ja (Partia Lëvizja
e Legalitetit) si në Bullgari, por LSI-ja”
Më poshtë Meta theksoi se nga LSI-ja do të
përfitojnë jo vetëm anëtarët
dhe simpatizantët e saj, por të gjithë
socialistët, natyrisht socialistët e ndershëm,
jo servilët të cilët janë arratisur
sot nga Berati, që të mos përballen me
Ilir Metën. Këta dallkaukë vinin para disa
kohësh 4 orë para për të takuar po
Ilir Metën. Takimi u mbyll me thirrjet Ilir Meta,
Ilir Meta!
Lajmëtari
Ja
lista e kryesisë së LSI-së Berat
1. Eduard Bejko, kryetar
2. Vladimir Mema, n/kryetar
3. Mina Kusta, n/kryetar
4. Edmond Zylyftari
5. Neritan Vito
6. Zana Ago
7. Luan Buba
8. Kastriot Rrapaj
9. Luman Spathara
10. Agim Spata
11.Bledar Çili
12. Irfan Metohu
Një
arsye më tepër për të qenë anëtar
i Lëvizjes Socialiste për Integrim
Bashkëqytetarët
e mi, profesioni i mjekut që unë ushtroj më
bën që të jem gjithmonë pranë
jush, pranë shqetësimeve dhe halleve tuaja të
përditshme. Jam mësuar të flas me ju, t’ju
dëgjoj e t’ju sugjeroj këshilla për
të përmirësuar gjendjen tuaj shpirtërore
e shëndetësore. Ndërsa sot po ju them me
zemër të pastër se ka edhe një arsye
më shumë për të qenë anëtar
i Lëvizjes Socialiste për Integrim.
Unë kam qenë anëtar i PS që në
orët e para të formimit të saj. Kjo për
bindjen time personale, por edhe për të ndjekur
një rrugë tashmë tradicionale të familjes
sime.
Kam pasur bindjen e njeriut të ndershëm se kjo
parti do të luftonte për të realizuar mirëqënien
e masës dhe jo të një grupi të caktuar
njerëzish, se do të aspirohej për një
Shqipëri më të zhvilluar me një fytyrë
të re.
Kështu, një ditë ndjeva zhgënjimin
për veten dhe për forcën politike së
cilës i kisha besuar idealet e mia, se brezi im është
brezi i idealeve, i ëndrrave.
Lëvizja Socialiste për Integrim është
pjesë e asaj lëvizje të fuqishme të
intelektualëve, por edhe e të gjithë njerëzve
të ndershëm për të respektuar vullnetin
demokratik të zgjedhjeve (çdo anëtar
një votë).
Gjithashtu është i drejtë mendimi për
të mos absolutizuar pushtetin në duart e një
njeriu. Kjo gjë do t’i japë më shumë
frymëmarrje mendimit të lirë dhe demokratik.
Përfshirë edhe të gjitha detajet e tjera
të programit, më bëjnë të sigurt
në mendimin tim si dhe në kërkesën
që do t’ju bëj të gjithë atyre
që më dëgjojnë dhe që më
njohin. Kjo lëvizje është e ardhmja e Shqipërisë
dhe në emër të saj ne kërkojmë
mbështetjen tuaj për ta çuar më
tej këtë alternativë të suksesshme
për t’i thënë një po të
madhe të ardhmes dhe Shqipërisë së
nesërme.
Mbështetja juaj është detyrimi ynë!
Me respekt
Edmond Zylyftari
|
|
