| |
LSI
e Beratit hidhet në ilegalitet
Ndonëse
Berati ka një media të zhvilluar (të paktën
si sasi), me dy TV-lokale dhe dy gazeta të tilla,
Lëvizja Socialiste për Integrim në Berat,
megjithse premtoi nëpërmjet një anëtari
të bordit të saj se do të dilte së
shpëjti në një konferencë për
shtyp, nuk u duk gjëkundi. Pas një prononcimi
me gjysmë zëri të një segmenti të
saj, kjo Lëvizje heshti deri në mosqenie. Disa
nga anëtarët e bordit të kësaj Lëvizjeje
në Berat janë parë në shoqëri
me shefin e LSI-së, z.Ilir Meta, dhe flitet se i
janë përbetuar se janë me të, se ndiejnë
neveri për fenomenin “Angjeli”, se i
bashkohen kësaj Lëvizjeje, jo thjesht për
para e karrierë, por për qëndrime programore
dhe parimore. Disa nga anëtarët e bordit të
kësaj Lëvizjeje, siç flasin nëpër
kafene, i telefonojnë darkë e saba Ilir Metës
dhe i konfirmojnë se Lëvizjes po i bashkohen
të gjithë socialistët që janë
të zhgënjyer nga slogani politik i kreut të
PS-së , Nano:
“ Me mua bëni më shumë para!”,
madje po i bashkohen edhe persona të pazotuar deri
tani në politikë, por që kanë bindje
politike të majta.
Pas zhvillimeve të vrullshme të ditëve
të fundit, që përfshinë këtë
Lëvizje në Tiranë e gjetkë, pas përvijimit
të qartë të saj si një parti politike
e spektrit të majtë, lësëistët
tanë në Berat u hutuan, u trembën, u fshehën.
Në mesditën e ditës së enjte, në
datën 2 shtator 2004, kërkuam të takonim
një anëtar të bordit të kësaj
Lëvizjeje për një prononcim në gazetën
lokale “Lajmëtari i Beratit”, një
anëtar të identifikuar në opinionin publik
si i tillë, por ai refuzoi të bënte koment,
i terrorizuar. E provuam edhe ditën e premte më
3 shtator, por… nuk kishte bir kurve ( siç
thotë Edi Rama), të gjente një njeri që
t’i dilte zot Lëvizjes Socialiste për
Integrim në gjithë qytetin e Beratit. Të
kenë kaluar në ilegalitet?! Të ketë
triumfuar dukuria e shëmtuar “Angjeli”
edhe në radhët e LSI-së së Beratit?
Te të kontaktuarit (kurrsesi nuk mund t’u themi
anëtarë të LSI-së), u pa një
frikë që të kujtonte mikun e dikujt që
sapo ishte arrestuar për agjitacion e propagandë
në kohën e Hoxhës. Madje njeri u shpreh:
“ Pse të dal unë, kur të tjerët
e drodhën?!”
Çfarë ka ndodhur?
Reagimi brutal, i cili rrjedh nga mentaliteti i vështrimit
bardh e zi, rrënjosur te shoqëria shqiptare
(biologët thonë se vetëm qeni sheh bardh
e zi), e kishte bërë punën e tij.. Reagimi
brutal i PS-së, e cila topin e vjetër ZP e ka
drejtuar drejt LSI-së, të kujton dënimin
e armiqve brenda partisë gjatë atyre 45 vjetëve
ferri. Parullat e vjetra për luftën e klasave
janë zhvendosur nga shpatet e kodrave dhe maleve
me “pakëz” shkallë zvogëlimi
në krye të faqes së parë të ZP-së.
Në fytyrat e tyre dallohej qartë se e kishin
marrë paralajmërimin për humbjen e postit,
humbjen e zyrës, humbjen e makinës, humbjen
e rrogës së lartë, humbjen e … Madje
kërcënimet dhe penalizimet kanë pas “salltanetet”
dhe i janë afruar bukës së gojës.
Në Shqipëri ca dritëshkurtër ende
mendojnë se Shqipëria me tërë resurset
e saj u takon atyre si dhuratë nga partia për
popullin socialist. Zoti i ruajtë këta të
gjorë kur të jenë pjesë e popullit
opozitar nga e njëjta mëndësi që zotëron
edhe segmente të rëndësishme të palës
tjetër!
Mentaliteti stalinist dhe ai klanor tipik shqiptar po
e mban të mbërthyer shoqërinë shqiptare
dhe ka ngritur mure të frikshëm me pjesën
tjetër të botë së qytetëruar.
Eshtë e trishtueshme se në Shqipëri mungon
guximi qytetar, ai guxim që ka vënë në
lëvizje energji të mrekullueshme në vendet
e qytetëruara, ndaj (megjithëse nuk dua të
bëj Kasandrën), dukuria tragji-komike e kongresmenëve
do të triumfojë mbi përpjekjet e një
grupi socialistësh për reformimin e së
majtës.
|
|
