Berisha në Berat

    Ditën e shtunë, më 28 shkurt 2004, doktor Sali Berisha erdhi në Berat. Me qindra simpatizantë ishin mbledhur në sallën e pallatit të kulturës "Margarita Tutulani" për ta pritur. Zoti Berisha shoqërohej në këtë takim edhe nga përfaqësues të forcave të djathta, si zoti Fatmir Mediu, kryetar i Partisë Republikane; zoti Ekrem Spahia, kryetar i PDL; zoti Adriatik Alimadhi, kryetar i Ballit Kombëtar, etj.
  Fjalën e hapjes e mori kryetari i degës së PD-së zoti Dritan Haznedari, i cili midis të tjerave tha: "Situata po i afrohet pikës kritike. Historia u përsërit më 21 shkurt, kur nuk ra busti i diktatorit, por ra qeveria, ra busti i kryeministrit. Lëvizja "Nano ik" nuk ishte një ftesë apo urdhër, por ajo ishte një këshillë, ndaj Nano dëgjo qytetarët dhe ik".     Më pas fjalën e mori fjalën z. Xheka, i cili tha ndër të tjera se drejtimi i shtetit duhet të ndryshojë metodën e punës. Z. Kasëm Mahmutaj, kryetar i degës së PR-së në Berat tha se Nano kërkon ndarjen e Shqipërisë në dy pjesë siç është Qipro. Shqipëria ka taksat më të larta, ka invazion fiskal, favorizohen firmat greke dhe monopolet shtetërore. Të gjitha këto i bën z. Nano.
    Ndërsa z. Adriatik Alimadhi, pasi përshëndeti bashkëpunimin institucional me PD-në, i kërkoi kryeministrit të Shqipërisë të japë dorëheqjen, ai dhe klika e tij bolshevike. Gjithashtu ai tha se protesta do të shtrihet në të gjithë Shqipërinë dhe i ftoi të gjithë nacionalistët të bashkohen me protestat sot, se nesër është vonë. Ai kërkoi qeveri të përkohshme, rregullimin e kodit zgjedhor, zbatimin e ligjit për pronat.
    Në vazhdim të takimit fjalën e mori z. Ekrem Spahia, i cili tha se protesta e 7 shkurtit i tregoi qeverisë se shqiptarët janë të bashkuar dhe se protesta e 21 shkurtit hodhi poshtë manipulimet e Nanos se protestat janë të dhunshme. Edhe zoti Osmo Liponen i OSBE denoncoi procesin zgjedhor dhe qeverisjen. Shqiptarët janë të bashkuar për protestat "Nano ik", ashtu edhe qytetarët e Beratit të bashkohen dhe të buçasë nga Tomori në Shpirag kjo thirrje. Ai kërkoi largimin e qeverisë për të çuar vendin në zgjedhje të parakohshme. Ndërsa kryetari i PR, Fatmir Mediu, tha ndër të tjera se ne jemi në këtë protestë, aty ku e nisëm në fillim, duke kërkuar zgjedhje të lira e të ndershme. Kjo ështe një qeveri diabolike. Ne duhet të ngjallim shpresën te çdo shqiptar se ne jemi e ardhmja.
    Në mes të fjalës së zotit Mediu ndodhi dhe ajo që nuk pritej, një "black-out" i energjisë elektrike duke i ndërprerë fjalën. Menjëherë në sallë janë shfaqur thirrjet kundër z.Nano dhe të gjithë së bashku kanë kënduar këngën "Eja mblidhuni këtu-këtu". Posa ka ardhur energjia elektrike fjalën e ka marrë kryetari i PD-së profesor doktor Sali Berisha, i cili tha se nëse në '90 u deshën disa muaj për të përmbysur pushtetin, në lëvizjen "Nano ik" u deshën vetëm dy javë. Nga data 7-21 shkurt shqiptarët i dhanë mesazh mbarë kombit dhe është transmetuar nga të gjitha mediat dhe është dëgjuar nga të gjitha kancelaritë e botës. Kjo është lëvizje shumëplanëshe, e cila ka një synim: t'i japë përgjigje të shpejtë problemit më të madh, atij të varfërisë. Kjo është një lëvizje vlerash dhe me këtë duhet të ecim me partneritet të plotë me shoqërinë civile, me botën akademike, me median, me biznesin. Është uragani qytetar që do të realizojë qëllimin e madh, rikthimin e zgjedhjeve të lira. Ndërkohë që të gjitha taksat janë të larta, faturat e dritave dhe telekomit, tvsh-në e paguajmë për çdo mall, dhe jo pak por 20%. Nga FMN 2/3 e taksave vidhen dhe vetëm 1/3 shkon në buxhetin e shtetit. Ai akuzoi ministrat Duka, Angjeli dhe Fino, për kalimin e 2-6 anijeve pa doganë. Ndërsa lidhur me KESH-in, ai tha se ata gënjejnë, kur thonë se është rritur kostoja, pasi ata fitojnë në vit 51 milionë dollarë. Çmimet janë rritur 45-50%. Ndërsa lidhur me Albtelekom, Berisha tha se ka vjedhje të shumave të pallogaritshme nga ana e pushtetarëve me kompanitë e tjera. Telekomi përfiton 80 milionë dollarë, ndërkohë që tarifat janë 15-20 % më të larta se në Gjermani. Buka është rritur, sipas z. Berisha, se Nano është bërë aksioner me dy firma të grandit të grurit, ku një nga ata është edhe Gëzim Bleta, ish-doganier i tij. Në Francë gruri shitet 150,euro ndërsa në Shqipëri 290 euro. Qeveria jep për Beratin një grant 60 milionë lekë të reja që i bie 10 $ për frymë, ndërkohë që vetëm me ujin paguan 10 $ tvsh në vit, ndërsa 90 milionë lekë Nano i harxhon me celularë. Në vitin 96 Këshilli i Ministrave harxhonte 850 000 $, ndërsa sot, Këshilli i Ministrave që kryesohet nga Nano, harxhon 8 000 000 $. Motoja e Nanos, sipas Berishës është : "Vidh sa të mundësh, të vjedhim së bashku".
    Më poshtë ai theksoi se ne jemi komb me të ardhme të shkëlqyer dhe se protesta që vjen do të jetë më madhështore, ku sheshi i Beratit, Vlorës, Fierit, dhe gjithë Shqipërisë do të kenë më shumë njerëz se gjethe në pemë dhe që të gjithë do të buçasin së bashku: "Nano ik".
    Gena Kote