HOME NEWS KULTURE

Murat Shehu,
kompozitori shqiptar në Filadelfia

Kompozitori beratas Murat Shehu, lindi në familjen beratase Shehu, më 15 gusht 1897 në lagjen “Muratçelepi”.
Që në fëmijërinë e tij, i ushqyer me ndjenjën e atdhedashurisë, i lindi dhe dëshira dhe pasioni që t’i këndojë në muzikë, atdheut të tij vendit të Skënderit, që me heroizëm të rrallë theu hordhitë osmane për gati një çerek shekulli.
Rreth moshës 15 vjeç në fillim të vitit 1912, duke parë gjendjen e rëndë dhe vështirësitë ekonomike që kalonte vendi, në luftën për pavarësi, detyrohet dali i ri Murat Shehu, bashkë me të tjerë moshatarë të vetë, të lërë prindërit dhe njerëzit e tij të dashur e të emigrojë larg atdheut në Amerikë.
Largimi i tij bëhet me qëllim që t’i vijë në ndihmë sado pak prindërve të vetë, që i la në mjerim me zemër të copëtuar, të varfër e në gjendje të rëndë ekonomike.
Me vajtjen në Amerikë, pas shumë peripecive të mundimshme për gjetjen e ndonjë pune, më në fund arriti të punësohet argat në një fabrikë lëkurash në Filadelfia.
Puna ishte shumë e vështirë, por djali 15-vjeçar Murat Shehu përpiqej ta përballonte atë ngarkesë shumë të madhe pune, e shumë të rëndë.
Murati, pasi u stabilizua në punë, zemra i qante për realizimin e ëndrrës së tij, atë të muzikës.
Ai ndjek studimet në fushën e muzikës. Në këtë fabrikë Murati punon përreth 50 vjet. Pasi mbaron studimet me sukses, ai punon pa u lodhur netëve vonë duke bërë shumë krijime në fushën e muzikës. Puna e vazhdueshme, talenti në fushën e artit, shpërthyen me sukses me tërë energjitë e tija mendore si kompozitor në gjininë e rapsodisë. Veprat e tija mbështeten kryesisht në thesarin e këngës popullore shqiptare, të cilën ai e ruajti në kujtesën e tij rinore. Ishte malli për Shqipërinë që e frymëzoi.
Krijimtaria e tij përfshin pesë rapsodi:
Rapsodia nr.1 (Albanian Rhapsody nr.1, simphonie
Poem).
Është e përbërë nga 133 faqe. Kurse rapsodia shqiptare nr.2 dhe rapsodia nr.3, janë nga 81 faqe. Ndërsa rapsodia nr.4 dhe rapsodia nr.5, për fat të keq humbën në rrethana kur ai ndodhej shtruar në spitalin e Filadelfias.
Kompozitori ka shkruar marshin e “Skëndërbeut”, Polka, etj.
Gjithashtu ai ka përgatitur mbi 30 këngë të ndryshme lirike. Përmendim:
“Shqipëri e re”, “Mëma jonë”, “Kënga e Sazanit”, “Një natë në Shqipëri”, “Trëndafili i Shqipërisë”.
“Zog Gjyzari”, “Gocë e lalës”, “Kur m’u qase pranë”, “Lulja e Shqipërisë”, etj.
Në kuadrin e 75-vjetorit të pavarësisë, orkestra simfonike e radiotelevizionit shqiptar, me dirigjentin, artistin e merituar Eno Koço, ekzekutoi për herë të parë me sukses raspoditë e kompozitorit Murat Shehu.
Në vitin 1984 orkestra simfonike e qytetit të Beratit, me dirigjentin djalin e këtij qyteti Fatbardh Dervishi, në koncertin e saj simfonik me vepra të zgjedhura të autorëve beratas, sukses për herë të parë rapsoditë e kompozitorit beratas Murat Shehu.
Krahas dirizhimit, dirigjenti Fatbardh Dervishi ka përfunduar dy vëllime me këngë popullore, të cilat do t’u mbeten brezave. Mendoj që autoritetet vendore, për të vlerësuar këtë pasuri të këngës popullore qytetare, ta sponsorizoi.
Murat Shehu, ky kompozitor shpreson dhe pse nuk jeton, të kontribuojë më shumë drejt një kuptimi më të mirë midis popujve të botës.
Murat Shehu ka ardhur disa herë në Shqipëri, në qytetin e tij të lindjes, mbas viteve 1965.
Veprat e këtij kompozitori të madh, ruhen me shumë kujdes në selinë e përfaqësisë sonë në OKB
si dhe në teatrin e operas dhe të baletit në Tiranë.
Një pjesë e mirë e veprave të këtij kompozitori ruhen me shumë kujdes në shtëpinë e nipit të tij në Berat, te z. Kadri Fierro.
Veprimtaria e tij shquhet për një dinjitet kombëtar dhe ka një nivel të lartë artistik.
Murat Shehu është një kompozitor i shquar, megjithëse te ne është njohur kohët e fundit.
Për të njohur vlerat e tij si kompozitor, po japim vlerësimin që i ka bërë muzikologu i njohur amerikan Herman Loxh:
“Murat Shehu në rethanat e tij e nëpërmjet talentit muzikor ka treguar me nostalgji për atdheun e vetë.
Nëse disa nëpërmjet gjuhës, skulpturës, pikturës, Murat Shehu nëpërmjet talentit të tij muzikor, ka bërë të njohur aspekte nga vendlindja e tij.
Atë e ka fryëmzuar në krijimtarinë e vetë lufta e popullit të tij gjatë gjithë historisë deri në ditët që ai jetoi. Dashuria për historinë e popullit shqiptar që atë e kanë frymëzuar në krijimtarinë e tij, të cilën ia ka dhënë nëna.
Përsa i përket muzikës ajo është një gjuhë universale që mund të prekë menjëherë zemrat dhe mendjet e popujve të ndryshëm.
Murat Shehu shpreson dhe pse s’jeton më të kontribuojë më shumë me vlerat që ka lënë të shkruara në kompozim.”

Stavri Bobo

Lajmetari: 13.11..2006. |top | Commente | Printo