Ish-komisari i hekurt i Beratit është përballur me togat e zeza

Ish-komisari i hekurt i Beratit Ilirian Dida, në orët e para të ditës së djeshme, është përballur me trupin gjykues në gjykatën e Beratit me gjyqtare Elvira Petri dhe kryeprokurorin e Beratit Xhemal Saliu. Dida gjykohesh nën akuzën fallsifikim dokumentash të shitjes së një makine tip benz. Madje, nën këtë akuzë, është akuzuar edhe noteri Arben Ndini, që ka bërë noterizimin e kësaj makine. Dy vjet më parë ish-komisari i hekurt i Beratit Ilirian Dida kishte blerë një makinë tip benz dhe ka bërë noterizimin sipas ligjeve në fuqi. Pas shkarkimit të Didës si drejtor i policisë së qarkut Berat, menjëherë kanë filluar kontrollet ndaj pasurive që dispononte Dida. Nga kontrollet e specialistët të qarkullimit rrugor, makinës së komisar Didës i është konstatuar se shasia është e ndryshme: sipas pohimeve numrat e shasisë janë fallsifikuar. Sipas dëshmive dhe nga seancat gjyqësore dhe policia, në manualin e policisë kjo makinë ekziston e vjedhur. Gjithsesi kjo akuzë nuk pranohet nga Ilirian Dida. Është seanca e 6-të dhe ende komisar Dida nuk është mposhtur nga akuzat e ngritura në emrin e tij. Dida në këtë seancë gjyqësore mbrohesh nga avokat Maksim Haxhia. Seanca gjyqësore u shty dhe do të vazhdoj në ditët e ardhshme.

Bllokohet veprimtaria e paligjshme e ish-uzinës të baterive

Zyra rajonale e krimit ekonomik ka bërë bllokimin e veprimtarisë së paligjshme të ish-uzinës së baterive. Burime nga zyra e krimit ekonomik pranë drejtorisë së policisë së qarkut Berat bëjnë të ditur se pas informacioneve që dispononte ky sektor për aktivitetin e paligjshëm dhe jashtë rregullave të sigurimit teknik, kanë mbërritur në vendngjarje dhe kanë bërë verifikimet e duhura. Nga hetimet paraprake është konstatuar se pronari i saj kryente veprimtari të paligjshme, prandaj specialistët e krimit ekonomik kanë bërë bllokimin në bazë të ligjshmërisë. Nga prodhimi i baterive pa masa mbrojtëse “hidrante pastrimi”, ka bërë që nënproduktet e plumbit të derdhen në ujërat e lumit, duke rrezikuar seriozisht jetën e banorëve të qytetit e periferitë e tij. Më të rrezikuar janë banorët që kanë ndërtuar shtëpitë e tyre në këtë territor tepër të infektuar nga plumbi. Sipas drejtorit rajonal të mjedisit Gafur Gishti, gjendja në këtë zonë është tepër kritike për jetën e njerëzve. Gjithmonë sipas Gishtit, rrezja vepruese e plumbit është rreth një kilometër. Madje këta banorë kanë bërë edhe shpime pusesh, për ujë të pijshëm. Sipas specialistëve, qumështi i bagëtive dhe lopëve është infektuar nga bari që kosnumohet. Ky qumësht më pas shitet në qytetin e Beratit. Të rrezikuar janë fëmijët e moshave të vogla, ka thënë Gishti. Ai mbylljen e aktivitetit të ish-uzinës së baterive e quan të drejtë, por shumë të vonuar.
Dilaver Xhelili

Zjarrfikësit shmangin djegien e puseve të naftës në Kozare

Ditë e tmerrshme për zjarrfikësit e Kuçovës. Thirrja “ndihmë, ra zjarr!” nga zonat naftëmbajtëse nuk ka rreshtur në numrin e tyre të telefonit. I pari ka sinjalizuar për rënie zjarri sektori i ndërmarrjes së nxjerrjes Kozare, që ka kërkuar ndihmën e zjarrfikësve. Shkaku ka qenë një zjarr i ndezur nga persona të papërgjegjshëm.Më pas ka marrë zjarr gropa e grumbullimit të rrjedhjeve të naftës, nga amortizimi i madh i puseve. Flakët kanë përpirë komplet rezervuarin, ku u rrezikuan seriozisht një seri pusesh nafte nga vatra me shtrirje të gjerë zjarri për të gjithë zonën. Menjëherë në vendin e zjarrit kanë shkuar zjarrfikësit dhe kanë bërë izolimin e vatrave të zjarrit dhe ka shmangur diegien e puseve. Burime bëjnë të ditur se, nëse zjarri do të kishte shtrirje, humbjet do të ishin të mëdha dhe do t’i kushtonin miliona lekë ekonomisë. Burime nga sektori i zjarrfikësve bëjnë të ditur se, ende pa u kthyer nga aksioni i fikjes së disa gropave të naftës në sektorin e Kozares, ra zjarr në lagjen Salcë - Kozare, ku flakët kishin përpirë një banesë nga djegia e disa kavaletave kashte. Vetëm veprimet e specializuara të zjarrfikësve të Kuçovës bënë shmangien e shkrumbëzimit të banesës së shtetasit 52-vjeçar H.N, banor në këtë fshat. Pas fikjes së zjarrit në fshatin Salcë- Kozare, zjarrfikësit janë lajmëruar me urgjencë për një tjetër zjarr në sektorin e puseve në fermën “Partizani”. Zjarri kishte përfshirë përsëri gropat e naftës së puseve. Fshatrat e zonësi kishin vënë zjarrin kashtës për të mbjellë kulturat e tjera, mirëpo kanë marrë zjarr gropat e naftës. Në vendngjarje kanë mbërritur përsëri zjarrfikësit që kanë shmangur djegien e puseve. Brenda 3 orëve, 3 zjarre në sektorin naftëmbajtëse të Kuçovës. Shefi i zjarrfikësve në Kuçovë tha për gazetën se zjarrfikësit e Kuçovës kanë bërë shmangien e djegieve të një numri pusesh, duke treguar aftësi profesionale dhe disiplinë në kryerjen e detyrës.
Dilaver Xhelili

Arrestohet në Rinas oficeri dezertor

Është arrestuar nga uniformat blu të policisë së Beratit, në bashkëpunim me komisariatin e policisë së Rinasit, në orën 7.00 të mëngjesit, oficeri i ushtrisë shqiptare Gazment Kosova, 28 vjeç, lindur në fshatin Lumas. Gazment Kosova, pas përfundimit të studimeve në shkollën e lartë të oficerave në Tiranë, është emëruar oficer në një repart ushtarak. Burime të policisë bëjnë të ditur se Kosova pas fillimit të detyrës si oficer, është dërguar për specialitet jashtë vendit. Por këto burime bëjnë të ditur se pas specializimit ai nuk rikthehet në Shqipëri për të kryer detyrën si oficer i specializuar për rritjen e nivelit të kualifikimit të ushtrisë. Pas një pauze largimi (ose dezertimi), ka kujtuar se çdo gjë ishte harruar dhe çdo gjë ishte lënë në harresë. Pikërisht në këto çaste ai arestohet. Është dënuar kohë më parë nga gjykata e Tiranës me 10 muaj burg në mungesë për shkak dezertimi të detyrës ushtarake, mbështetur në nenin 275 të kodit penal.
Arrestimi
Në orën 07 të mëngjesit, 28-vjeçari Gazment Kosova ka zbritur nga avioni i linjës. Madje, pa arritur të afrohej në mjediset e pikës së kontrollit të kalimit, është ndeshur me policinë kriminale, e i ka vënë prangat dhe e ka mbyllur në qelinë e burgut të Beratit për të vuajtur dënimin. Tashmë, 28-vjeçari Kosova, i nipi i ish-shefit të shtabit Sheme Kosova, do të vuajë dënimin në burgun e sigurisë së lartë të Beratit.
D. Xh

Shfaqet virusi i plasjes në Berat

Shfaqet plasja në zonat periferike të Beratit e pikërisht në fshatin Bistrovicë . Specialistët thonë se plasja rrezikon seriozisht jetën e banorëve, pasi produktet e mishit, qumështit dhe nënprodukte të tjera u shiten qytetarëve të bashkisë së Urës-Vajgurore e më gjerë. Burime pranë drejtorisë së bujqësisë e ushqimit bëjnë të ditur se në këtë zonë kanë zbritur menjëherë specialistët e sektorit zooveterinar për të marrë masa të menjëhershme për parandalimin e këtij virusi shumë të rrezikshëm për jetën e banorëve. Janë konstatuar 30 kokë bagëti që mbartin virusin e plasjes. Specialistët pohuan se pas ekzekutimit të bagëtive ato janë djegur. Drejtori i bujqësisë e ushqimit Adriatik Çela tha për gazetën se me marrjen e sinjalit në këto zona kanë zbritur specialistët përkatës nga ku po ushtrohen kontrolle periodike për mbajtjen nën kontroll të situatës pas shfaqjes së këtij virusi. Më tej ai ka thënë se kontrolle po ushtrohet edhe në zonat e tjera të prefekturës ku mbarështrohen kafshët blegtorale. Kontrolle po ushtrohen edhe në zonat e qytetit ku tregtohet mish dhe produkte të tjera blegtorale duke kryer analizat përkatëse për secilën nga këto produkte.D.Xh

Rikthehet 97-a në zonën e Kutallisë
QëlloiFrikë dhe panik në fshatrat e komunës së Kutallisë nga terrori i ushtruar nga fiset tashmë të njohur nga banorët e fshatrave Samaticë, Drenovicë e Kutalli. Burime të policisë së qarkut të Beratit bëjnë të ditur se rreth orës 24.00 persona të paidentifikuar kanë sulmuar në shenjë hakmarrje lokalet e fisit Hoxha. Burime të policisë dhe banorëve të fshatrave bëjnë të ditur se persona ende të paidentifikuar kanë qëlluar me armë automatik kallashnikov lokalet e shtetasve të fiseve Vrapi dhe Hoxha, në lokalin e Nuri Gishtit dhe Gramoz Hoxhës në fshatin Drenovicë dhe lokalet e shtetasit Mirjan Bega, Samaticë dhe dyqanin e celularëve të vëllait të Mirjan Begës në Kutalli
Ngjarja
Persona të armatosur të dy fiseve janë nisur me armë automatikë dhe në shenjë hakmarrje kanë qëlluar mbi lokalet e shtetasve Gramoz Hoxha, Nuri Gishtit dhe Mirjan Bega në fshatin Samaticë dhe E. Bega në fshatin Kutalli. Nga breshëritë e automatikëve që hodhën qindra fishekë, janë shkatërruar komplet lokalet dhe dyqani i celularëve. Pas këtij terrori autorët janë larguar me motorr për në fshatin Goriçan. Motorrin e kishin lënë në baçen e shtetasit Beqar Hoxha në fshatin Goriçan që tashmë është shoqëruar për në dhomat e paraburgimit në komisariatin e Beratit. Bëhet e ditur se të 3 fshatrat e terrorizuar janë mbërthyer nga frika e paniku. Ata thanë se po rikthehet 97-a në zonën e gjakut pas një pauze qetësie. Policia ka bërë identifikimin e autorëve, por nuk bën të ditur emrat e tyre për efekt hetimesh.
Policia
Pas marrjes së sinjalit, forca të mëdha të policisë kanë udhëtuar 25 km për të mbërritur në vendngjarje, kanë blinduar komplet zonën dhe kanë bllokuar të gjitha hyrjet e daljes së kësaj zone ku tashmë, po rikthehen hasmëritë e vjetra. Bëhet e ditur se së bashku me policinë e Fierit, Lushnjes dhe Kuçovës ka filluar aksioni për kapjen e autorëve dhe prangosjen e tyre. Banorët e zonës i kanë kërkuar organeve të policisë marrjen e masave urgjente për të shmangur rihapjen e tragjedive të viteve të mëparshme në këtë zonë ku u vranë rreth 21 veta. Qetësia në këtë rajon ka rreth 6 muaj që i ka humbur parametrat e sigurisë.