Burime nga drejtoria e policisë e qarkut bëjnë të njohur se Ministri Toska e ka firmosur lirimin nga detyra të kreut të policisë së qarkut të Beratit Kokonozi.
Drejtori i policisë Kokonozi ende nuk e ka mbushur vitin në këtë post, kur është njohur me vendimin e Toskës për ta liruar nga detyra.
Gjatë këtij viti policia e Beratit ka patur arritje në zbulimin dhe kapjen e autorëve të disa krimeve por duhet thënë se janë shtuar rastet e vjedhjes së pronës private, sidomos vjedhja e shtëpive.
Gjithashtu është bërë pak e aspak nga drejtoria e policisë dhe policia gjyqësore dhe prokuroria e Beratit për zbardhjen e krimeve të rënda vrasje, plagosje, dhunime, vjedhje, grabitje, të cilat ndodhën gjatë vitit 1997 dhe më pas. Edhe në analizat e pushtetit lokal është kërkuar nga të zgjedhurit që këto sruktura të punojnë për të çuar para përgjegjësisë të gjithë ata që kryen krime gjatë viteve 97-98, por duhet theksuar se edhe policia edhe prokuroria i largohet si djalli temjanit.

Intervistë me Roland Gjanin, drejtor i filialit të postës në Berat

Në media flitet për abuzime me pakot e qytetarëve. Cila është praktika e postës shqiptare në transportin e objekteve postare?

Në filialin e postave në Berat, të gjitha objektet postare që mbërrijnë nga Tirana i nënshtrohen kolaudimit të përditshëm nga një komision prej 6 anëtarësh. Në krye të komisionit është kryetarja e zyrës së postës së qendrës, zonja Dituri Urupi, ekonomiste me arsim të lartë. Ky komision realizon marrjen në dorëzim të objekteve postare, konform rregullores së shërbimit postar si për letrat, paketat dhe kutitë. Pas marrjes në dorëzim, me dokumentacion të rregullt, letrat i marrin shpërndarësit për t’i shpurë në destinacion te qytetarët, ndërsa për kolitë, meqënëse janë voluminoze, shpërndarësit çojnë lajmërim-marrje te qytetarët, të cilët paraqiten personalisht në postë për të tërhequr kolitë. Kolitë e ardhura nga Tirana janë të vendosura në thasë bezeje, të plumbosura, ku në një thes gjenden 2-3 pako, sipas madhësisë. Kolitë i nxjerrim nga thasi për t’u marrë adresat dhe nuk hapen nga posta shqiptare, as në qendër as gjatë transportit, as në terminal në postën e Beratit. Bëhet vetëm verifikimi i peshës për të parë nëse përputhet pesha e kolisë me atë që shkruhet në etiketë. Posta jonë çon njoftimin te qytetari për kolinë dhe peshën egzakte dhe ia peshojmë për të vërtetuar në sytë e tij peshën e kolisë kur e merr në dorëzim.
Për rastet kur ambalazhi i një objekti postar qoftë letër, paketë ose koli, është i dëmtuar nga pamja e jashtme (i lagur, i grisur, i shtypur, etj), nga ana e komisionit në qendrën e tranzitit në Tiranë objekti riambalazhohet, plumboset dhe shoqërohet me procesverbal që shpjegon ri-ambalazhimin e bërë me komision. Këto qeska futen në thasë të shoqëruara me dy etiketa (në thasë të veçantë). Pastaj njoftohet klienti dhe i shpjegohet riambalazhimi para dorëzimit.
E theksojmë se edhe në qendrën e tranzitit në Tiranë riambalazhimi bëhet në dhomat e sigurisë, të cilat janë nën vëzhgimin e kamerave për 24 orë rresht. Le të vijmë te rasti konkret. Qytetarit Nevruz Selmani në 6.04.2004 i vjen një koli nga Italia me shërbimin EMS (shërbim ekspres). Ambalazhi i kësaj kolie ishte dëmtuar. Brenda ditës u njoftua qytetari. U paraqit në postë personi përgjegjës te sporteli i kolive për të marrë pakon. Nga ana e punonjëses sonë, Mimoza Saraçi dhe në prezencë të kryetares së zyrës znj. Dituri Urupi iu shpjegua qytetarit se pakoja ka ardhur e dëmtuar dhe është riambalazhuar nga komisioni i Tiranës, fakt që vërtetohet nga procesverbali për peshën dhe riambalazhimin, thesi me dy etiketa sipas rregullave të shërbimit postar. Qytetari në fjalë, duke parë objektin me ambalazh të dëmtuar, refuzoi marrjen , gjë të cilën e ka firmosur edhe në formularin përkatës.
Të ndodhur para këtij fakti objekti koli postë me numër EE 317966073 IT u rikthye nga ana e postës në Tiranë, (në origjinë), me shënimin përkatës. Pre-tendimet e qytetarit se mungon ky apo ai objekt nuk qëndrojnë, pasi kolia nuk u hap as në Berat nga qytetari, as nga posta që nuk e ka për detyrë. Atëherë nga e mori vesh qytetari se mungonte x apo y artikull në pako?!
Theksojmë se pas sqarimit të kryetares së zyrës znj. Urupi, qytetari u shpreh se nuk kam asgjë me ju të postës së Beratit. Falenderoi për sqarimin punonjësen dhe u largua.
Mendoj se deri në këtë çast e gjithë struktura e filialit të postës Berat ka vepruar konformë rregullores së shërbimit postar të Shqipërisë.

Pse u bë gjithë kjo zhurmë në media për këtë problem?

Mendimi im është se arsyet janë dy: e para: në qytetin e Beratit, si edhe në qytete e tjerë të Shqipërisë janë futur edhe operatorë të tjerë të licensuar në shërbim postar, të cilët kërkojnë të marrin tregun, por mënyra që po përdoret është e pandershme dhe e dyta: ndoshta ka një keqdashje për ndonjë nga punonjësit e filialit të postës Berat. E them këtë sepse edhe nga verifikimi i dokumentacionit që bëri policia, nuk konstatoi asnjë shkelje ligjore.

A ka patur probleme të dëmtimit të humbjes së objekteve postare në postën shqiptare?

Gjatë 7 vjetëve që unë drejtoj filialin, në filialin e postave në Berat nuk ka patur asnjë vjedhje të objekteve postare, ndërsa objekte të dëmtuara dhe për mangësi brenda në koli kemi patur 4 raste ankimi nga qytetarët, të cilat i kemi bërë problem në drejtorinë e përgjithshme nëpërmjet reklamacioneve dhe informacioneve të ndryshme. Posta shqiptare këto shqetësime i ka patur nga dërgesat që vinin nga Italia dhe Anglia, gjë për të cilën administratave të këtyre shteteve u është kërkuar ndihmë dhe kanë rënë dakord të vinë në Shqipëri për zgjidhjen e problemit.
Shqetësimet kanë ardhur nga aeroporti i Milanos dhe një nga aeroportet e Londrës.

Çfarë do t’u thoni qytetarëve të Beratit dhe posaçërisht klientëve tuaj?

Filiali i postave Berat renditet në pesë filialet më të mira të Republikës në drejtim të rritjes së të ardhurave, llojshmërisë së shërbimeve dhe cilësisë së tyre. Nisur nga ky fakt i bëj thirrje qytetarëve të Beratit, posaçërisht klientëve tanë që të mos dekurajohen nga disa shkrime dashakeqe, pasi në filialin e postave në Berat do të gjejnë një shërbim të kulturuar, cilësor dhe të garantuar.
Lajmëtari

Diskutohet zgjidhja e problemit të Urës së Goricës

Para disa ditësh u organizua në bashkinë e Beratit një takim konsultativ për mundësinë e zgjidhjes përfundimtare të problemit të Urës së Goricës.
Në këtë takim morën pjesë përfaqësues nga Drejtoria e Përgjithshme e Rrugëve, Instituti i Studimeve Urbanistike dhe drejtoria e Monumenteve të Kulturës.
Në këtë takim u gjykua si mundësi e vetme e zgjidhjes së këtij problemi, duke u mbështetur në planin rregullues të qytetit të vitit 1983, ngritja e një ure të re mbi lumin Osum diku pranë digës.
Takimi ishte një mbledhje fillestare, që do të pasohet nga takime të tjera për ta vënë ngritjen e kësaj ure në rrugën e projektimit dhe të zbatimit. Lajmëtari

Vidhen dy banesa brenda 10 minutave

Seri vjedhjesh në qytetin e Beratit. Brenda një harku kohor prej 10 minutash vidhen 3 milionë lekë në dy banesa ngjitur me njëra-tjetrën në lagjen “Kodra e Sulmit” të qytetit.
Burime zyrtare bëjnë të ditur se janë vjedhur dy banesa që i përkasin shtetasve Fanie Mingo dhe Sokrat Bandi, që të dy banorë të lagjes “Kodra e Sulmit”, nga persona të paidentifikuar.
Vjedhjet janë denoncuar në polici nga pronarët e banesave.Burime të policisë bëjnë të ditur se për të dyja vjedhjet e banesave u kryen veprimet proceduriale në vendngjarje.
Nga hetimet e kryera dhe denoncimet e pronarëve të banesave është konstatuar se në banesën e shtetasit Sokrat Bandi, 50 vjeç, janë vjedhur dy milionë lekë të vjetra dhe disa bizhuteri ari.
Gjithashtu në banesën e shtetases Fanie Mingo është konstatuar vjedhja e një shume prej 1 milion lekësh të vjetra. Gjithmonë sipa burimeve të policisë vjedhja është kryer në çastin që në banesë nuk ka patur njeri. Personat të paidentifikuar, duke shfry-tëzuar këtë çast, kanë shqyer dyert e banesave me levë hekuri në formë piruni dhe kanë kryer vjedhjen. Sipas policisë hajdutët kanë qenë të sprovuar duke kryer vjedhje të shpejtë të dy banesave që ndodheshin ngjitur me njëra-tjetrën, brenda 10 minutave. Në të dy banesat u fiksuan gjurmë të vlefshme për identifikim. Policia po punon për kapjen e autorëve.
Vjedhja e dy banesave kanë plotësuar numrin 20 brenda harkut kohor prej dy muajve në Berat, ku autorët e vjedhjeve nuk janë identifikuar dhe prangosur nga policia. Këto veprime vje-dhjesh kanë shqetësuar komunitetin e Beratit. Banorët janë të alarmuar për mungesën e sigurisë se nuk ka siguri më për banesat e tyre që në çdo çast mund të vidhen. D.XH

Grinden dhe më pas plagosen

Një konflikt midis tre personave ka përfunduar në grindje me pasoja të rënda për jetën.
Burime të policisë bëjnë të ditur se në mbrëmje është qëlluar me qytë të pistoletës shtetasi Arjan Belishaku, 33 vjeç, banor në fshatin Kuç nga dy shtetasit përkatësisht Halit Dervishi, 30 vjeç, dhe Valter Dervishi, 28 vjeç. Burimet e policisë bëjnë të ditur se pas një debati të ashpër midis kushërinjve Dervishi, banorë të fshatit Gajdë, njëri nga këta e pikërisht Halit Dervishi ka nxjerrë pistoletën që e mbante pa leje dhe e ka goditur me forcë në kokë duke e dëmtuar rëndë shtetasin Arjan Belishaku, i cili ndodhet në spital.
Menjëherë në vendngjarje kanë mbërritur forcat e grupit të gatshëm dhe ekspertët e kriminalistikës. Pas kqyrjes së vendngjarjes është shoqëruar për në spitalin rajonal, i plagosuri 33-vjeçari, Arjan Belishaku.
Sipas mjekëve plagosja nuk ka rrezik për jetën e tij. Burimet bëjnë të ditur se policia po punon për kapjen e autorëve. D.Xh

Arrestohet adoleshenti

Qëlloi bashkëmoshatarin me automatik për ta vrarë Ka rënë në kurthin e policisë së Gjirokastrës një 16-vjeçar, në tentativë për të kaluar kufirin, pasi ishte shpallur në kërkim nga policia e Beratit me vendim të gjykatës së qytetit. Marken Nasufi, 16 vjeç, është arrestuar nga policia e Gjirokastrës në bashkëpunim me policinë e Beratit. Arrestimi i tij është bërë se në datën 19. 07. 2004 ka qëlluar me armë zjarri për të vrarë shtetasin Robert Gega në vendin e quajtur “Kthesa e spitalit”.
Marken Nasufi, banor në lagjen “Uznovë” të qytetit, pas atentatit është larguar në drejtim të paditur. Pas denoncimit të shtetasit Rober Gega, gjykatësi ka caktuar masë të sigurisë “arrest burgu”.
Policia pas dy muajsh pune e kërkim ka bërë të mundur vendbanimin e tij në Gjirokastër dhe në bashkëpunim me policinë e këtij rrethi bëri të mundur ndalimin e 16-vjeçarit në çastin që ai do të kalonte kufirin. 16-vjeçari, Nasufi, i akuzuar për veprën penale të armëmbajtjes pa leje dhe kanosje serioze për vrasje, vepër penale të parashikuar nga neni 278/2 dhe 84 të Kodit Penal, tashmë është shoqëruar për në dhomat e paraburgimit në komisariatin e policisë Berat. D.XH

43-vjeçari Metush Selenica është vënë në prangat e policisë si kultivuesi i bimëve narkotike

Vazhdojnë aksionet e befasishme të policisë së Beratit për zbulimin dhe shkatërrimin e bimëve narkotike në zonat rurale.
Burime të policisë bëjnë të ditur se forcat e policisë, në bashkëpunim me zyrën e antidrogës në drejtorinë e policisë së qarkut të Beratit, bënë të mundur zbulimin e më pas asgjësimin e 20 rrënjëve kanabis sativa në fshatin Zhitom. Bimët narkotike, sipas policisë, kanë qenë në fazën e lulëzimit të tyre dhe pronë e shtetasit Metush Selenica.
Burime të policisë thanë se në orën 14.00 është bërë ndalimi i Metush Selenicës dhe është shoqëruar për në dhomat e paraburgimit të komisariatit të Beratit. Brenda 24 orëve policia ka asgjësuar 250 rrënjë kanabis sativa dhe ka arrestuar 3 shtetas, njëri është në kërkim.
D.Xh

Vidhet benzi në mesnatë

Shtrihet gjeografia e vjedhjeve nga qendra e qytetit në periferitë e rrethit Berat. Tashmë vjedhjet e banesave ia kanë lënë radhën vjedhjeve të makinave luksoze. Burime të policisë së qarkut Berat bëjnë të ditur se në datën 06. 09. 2004, në orët e natës, është bërë vjedhja e makinës tip benz.2000, me targa BR 7647A, pronë e shtetasit Leonidha Nushi, 35 vjeç, banor në fshatin Pobrat, vetëm 25 km larg qytetit. Vjedhja është denoncuar nga i zoti i makinës në polici. Në vendngjarje kanë mbërritur ekspertët e policisë kriminale. Materialet i kanë kaluar prokurorisë për hetime të mëtejshme.