Berat- Editorial -Zgjedhjet mbaruan ... zgjidhjet kur do të fillojnë

Zgjedhjet mbaruan ... zgjidhjet kur do të fillojnë?

Fushata elektorale për zgjedhjet vendore përfundoi në qytetin e Beratit dhe komunat e saj. Berati meriton notën më të lartë për qetësinë dhe rregullin me të cilat i përcolli këto zgjedhje. Në Berat nuk u shënua asnjë incident. Të gjithë shkuan paqësisht drejt kutive të votimit dhe vendosën me vullnetin e tyre të lirë për udhëheqjen e bashkive dhe komunave për 4 vitet e ardhshëm. Nderim për qytetarët e Beratit kudo që janë, në qytet dhe në komuna!
Në Berat fitoi e majta, në qytet dhe në komuna, me përjashtim të komunës së Cukalatit. Natyrisht, qe vullneti i këtyre banorëve për të mos e ndryshuar ngjyrën politike të udhëheqësve të kësaj treve edhe për 4 vjetët në vazhdim. Ndoshta e djathta nuk e ka përcjellë të qartë mesazhin e saj për një qeverisje më moderne, më europiane, më fantaziste, më afër qytetarëve, ndoshta ... Sidoqoftë qeverisja vendore gjatë tre viteve që kaluan ka qënë në përgjithësi me defekte..., herë – herë edhe primitive, por në respect të vullnetit të qytetarëve shpresojmë që kjo qeverisje të ndryshojë për mire në komuna dhe në bashkitë e rrethit të Beratit. Tani do të presim që qytetit të Beratit t’i kthehen institucionet kulturore që pothuajse i kanë munguar gjatë 6 viteve që shkuan. Presim t’i ndërtohen kalldrëmet që i kishte dhe iu shkatërruan para 2 viteve. Presim të pastrohen dhe ndriçohen rrugët, presim të urbanizohen periferitë. Presim të zhvillohet biznesi dhe të hapen vende të reja pune. Presim të zhvillohet turizmi kulturor dhe të rriten të ardhurat e qytetarëve. Presim të ndërtohet tregu i ri dhe lagjja “30 vjetori”, që i dha aq shumë besim të majtës në këto zgjedhje, të shpëtojë një herë e mirë nga dekori i mjerimit të batanijeve të Luftës së Dytë Botërore. Presim të ndërtohen më shumë rrugë e rrugica, më shumë parqe e kënde lojrash për fëmijët. Presim përmirësim të standarteve në kopshte e shkolla. Presim investimet e munguara në Qendrën Kulturore të Fëmijëve. Presim politika frytdhënëse të bashkisë së Beratit për të tërhequr investime të kapitalit vendas dhe atij të huaj. Presim një qeverisje transparente, ku qytetarët të informohen për gjithçka që ka të bëjë me cilësinë e shërbimeve publike. Presim që bashkia të rrisë kapacitetet e saj menazhuese për të shfrytëzuar energjinë positive të anëtarëve të këtij komuniteti, në të mirë të qytetit, në të mirë të zhvillimit dhe begatimit të tij. Presim të ndalet rrjedha e banorëve të këtij qyteti drejt qyteteve të tjerë. Presim që udhëheqësit e zgjedhur sërish të ushtrojnë gjithë përgjegjësitë për të ndryshuar shërbimin shëndetsor dhe gjithë shërbimet e tjera publike në qytet. Presim dhe shpresojmë.
Yzedin Hima

Titujt kryesore

Zgjedhjet mbaruan ... zgjidhjet kur do të fillojnë

Këshilltarët e bashkisë Berat

Rezultatet pas numerimit te votave per Kryetar Bashkie Berat e Kuçove

Kronika e javes shkurt

Aprovuan kandidatet e PD-se per kryetar bashkie dhe komuna.

HOMAZH PËR EMRIN E NJERIUT

Udhëtimi i artistit- Ekspozite e piktorit Jak Sereqi

Pse humbi Partia Demokratike në Berat

Tomori turpërohet në shtëpi nga Gramshi

Zgjedhjet mbaruan ... zgjidhjet kur do të fillojnë?

Lajmetari: 26.02..2007. |top | Commente | Printo