Berat- Nëpër faqet e gazetës “Lajmëtari”

Nëpër faqet e gazetës “Lajmëtari”

Jo vetëm si bashkëpunëtor i gazetës, por në radhë të parë si lexues i rregullt dhe si qytetar i Beratit, kam të drejtën të shfaq mendimet e mia, jo vetëm për hallet dhe problemet e tija, por dhe për shkrimet e shkruara në këtë gazetë. Në asnjë mënyrë për të bërë vlersimin e tyre, por për të shtjelluar e për të sqaruar më tej mendimin apo idetë e autorëve të shkrimeve të ndryshme, jo vetëm për vete, por në radhë të parë për qytetarët dhe lexuesin e gjerë të gazetës. Si ide e re që më erdhi për të hapur këtë rubrikë, që, po gjet miratimin e redaksisë, të vazhdojë deri sa të jetë i gatshëm dhe në gjendje autori i këtij shkrimi ta mbajë hapur.
Po e filloj me intervistën e dhënë nga kryetari i komanduar i PD-së, doktor Shkëlqim Hysi. Nuk e di është harresë e gazetarit, apo është dëshirë e kryetarit të komanduar të PD-së z. Hysi, për të mos zbuluar qenien e tij kryetar dhe kandidat i një partie tjetër në zgjedhjet 2001-shit. Kjo, nuk është gjë e re që ndodh nëpër partitë tona, që ndërrojnë ngjyrë si kameleoni, por të paktën ta pyeste kryetarin e komanduar, çfarë e shtyu që ndërroi partinë që përfaqësoi në zgjedhjet e tjera, që tani të aderojë te Partia Demokratike? Nga ajo kohë, mua më ka ngelur mendja në një nga mitingjet, apo takimet që bënte z. Hysi me lektoratin e tij, kur tha: “Nëse nuk votoni për mua, votoni për shokun Flamur Rogu!” Këtë nuk kuptoj, si ka mundësi që aderon në Partinë Demokratike që nga viti 2001 dhe të kandidojë për një parti tjetër dhe aq më shumë të bëjë thirrje që nëse nuk votohej për të, të votohej për kandidatin socialist!

II

Refleksionin tjetër e kam për shkrimin e kronikanit, të gazetarit të njohur Dilaver Xhelili, i cili ngre shqetësimin e tij të drejtë për rrugët e shkatërruara të Beratit. Për këtë qëllim, gazetari Xhelili na bën të njohur shqetësimin e vetë të kryetarit të bashkisë, zotit Fadil Nasufi, i cili thotë se bashkia ka 10 projekte të përgatitura që prej një viti. Pra, që nga koha kur erdhi në fuqi PD-ja, që këto projekte u hartuan me shpejtësi nga specialistët, projektet e të cilëve iu përcollën me shpejtësi qeverisë (ministrisë përkatëse) që t’i dërgojnë paratë bashkisë, që për çudi, qeveria (ministria) ka jo “pak”, por 7 muaj që nuk është bërë e “gjallë!”
Kam një pyetje për gazetarin e nderuar Xhelili, përse nuk e pyeti kryetarin e bashkisë se cilat rrugë i kanë këto projekte të gatshme që kërkokan 800 milionë lekë (që i bie të jenë 8 miliardë me të vjetra)? Mos vallë ka ndonjë nga ato rrugë që janë shtruar brenda 8 vjetëve nga 3-4 herë dhe paratë e tyre kanë shkuar për lesh bubi? Këto gjëra duhen sqaruar. Jo gjithnjë e ka fajin “nusja”. Jo gjithnjë e bën të shtrembër kulaçin “nusja” (qeveria). T’i japim Çezarit ç’i takon, po të mos harrojmë t’i japim edhe Zotit pjesën e vet!

III

Jam plotësisht dakort me mendimet dhe shqetësimet e djaloshit Evis Plaku. Qe një mbrëmje e bukur, që nuk u la të shijohet nga ata, që duan të bëhen pa të drejtë protagonistë të shfaqjeve. Artikullshkruesi ia ka gjetur dhe shkaqet e këtij “protagonizmi” të padëshirueshëm të turmës, që vetëm di të gërthasë e të ulërijë, por që nuk lejon dhe të tjerët të shijojnë atë për të cilën kanë ardhur duke paguar. Pse ndodh kjo? Ndodh sepse shfaqje të tilla në qytet janë harruar prej kohësh. Nuk është mirë që qendra kulturore të ndjekë thënien e vjetër popullore: “Një herë në mot del e kullot” (si puna e draprit). Kjo qendër kulturore dhe kur bën vaki që të organizojë ndonjë aktivitet (shfaqje artistike), nuk shqetësohet dhe nuk punon që të edukojë dhe të kërkojë llogari, madje dhe ti “ndëshkojë” ata që e prishin rregullin elementar gjatë shfaqjes, si psh lëvizjet sa herë që t’u dojë qejfi teraqinjve të duhanit, që hynë e dalin mbi 7-8 herë gjatë një shfaqjeje. Po të ketë shfaqje më të shpeshta, po t’u kërkohet llogari atyre që i prishin këto rregulla dhe spektatorët beratas do të kthehen në “identitet” ku kishin qejf e dëshirë të jepnin shfaqje tërë trupat e teatrove profesioniste, qoftë të dramës, qoftë të estradës. Spektatori beratas është shquar gjithnjë për kulturë dhe edukatë. Këto cilësi ia prishën shfaqjet e dobëta dhe heshtjet e drejtuesve për të mos pakësuar numrin e shikuesve që vijnë për gallatë e jo për të parë shfaqjet. Ky mentalitet duhet të ndryshojë. Sikur vetëm këtë të arrijë të bëjë qendra kulturore, që të bindë (brenda në sallë) spektatorët të rrinë urtë, e ka bërë tërë punën edukative e kulturore.

IV

Janë dy shkrimet më të bukura të këtij numri. Ndërsa në shkrimin e z. Elham Pasha, mësues, studiues e publicist i njohur shkrimi e ka dhe hallin (shqetësimin) qytetar si mësues, por ka dhe rrugën për t’u zgjidhur ky hall, jo vetëm për ish-nxënësin e tij nga Vokopola e Tërpanit të Beratit, por dhe më gjerë. Ngado që ta “kapësh” e ta lëshosh këtë shkrim të bën të mendosh se çfarë poshtërsish bëhen nga ata që kanë dhënë e japin “drejtësi”. A e vret ndopak ndërgjegjja prokurorin, që kërkoi miliona për të ndryshuar cilësimin e të akuzuarit si “kapobandë?” A e pyeti ndonjëherë veten prokurori a gjyqtari se kush i polli e kriminalizoi këta adoleshentë? A e dinë prokurorët e gjyqtarët se pas vitit ’97 shumë banditë u bënë shefa e komisarë policie, madje dhe vrasës, ishin pikërisht këta dhe partitë që i drejtonin që i frynin sqetullat dhe në fund pasi i shtrydhën sot po kalben. Po ata që nuk kishin faj, po vuajnë vite të gjata dënimi për faj të shpirtit të zi e të makutërisë së prokurorëve, gjykatësve e të avokatërve fallsifikatorë e të korruptuar që kanë bërë e bëjnë sot e gjithë ditën sekserin, midis treshes gjyqtar, prokuror, avokat. Për këta adoleshentë, që nuk duhet kurrësesi të burrërohen nëpër burgje (sigurisht kur për ta ka falje për të cilat janë dënuar), duhet që komuniteti ku kanë jetuar, në rastin konkret komuna, shkolla e pse jo dhe drejtoria arsimore, për nxënës të dënuar me pa të drejtë, të ngrejnë zërin e të bëjnë çmos që drejtësia të vihet në vend. Po kjo është e zorshme, kur vetë prokurorët që do ta rishqyrtojnë këtë çështje, mund të kenë qenë ata që kanë kërkuar lekët. Megjithatë përpjekjet për të mos i lënë të burrërohen burgjeve duhen bërë.

V

Për shkrimin e publicistit por dhe specialistit të administratës, z. Kadri Kuka, dua të shkëpus këtë fragment nga shkrimi i tij me vlerë: “Pra, në thelb kjo kategori njerëzish që po i frynë më shumë nga ç’duhet imoralitetit rinor, nuk merr përsipër të gjykojë sa i kemi krijuar ne rinisë kushte për argëtim, sa mjedise rinore kemi ne për rininë, sa veprimtari rinore ne organizojmë, sa projekte rinore ne organizojmë!” Të tëra këto janë të vërteta, të drejta e të arsyeshme dhe shqetësuese. Pyetja është kjo për gazetarin, publicistin dhe zyrtarin Kuka:
-Kujt ia kërkon të tëra këto që parashtrove më lart? Cilët janë ata që duhet t’i bënin e të kujdeseshin për këtë infrastrukturë, që në rastet më të shumta nuk u shfrytëzua si e sa duhet dhe në rastet më të këqija nuk u ruajt për të grumbulluar të rinjtë? Zoti Kuke përmend vetëm diskotekat e pabet, por nuk thotë një gjysmë fjale për ambientet sportive si këndet e lojërave nëpër sheshe pallatesh, mungesën e fushave të futbollit ku të stërviten sportistët (megjithëqë nga monizmi dhe qeverisja demokratike 1992-1997 i trashëguam këto palestra), sot nuk kemi asnjë për të qenë që të funksionojë për qëllimin që është ngritur. Vërtetë që nga viti 1998 e deri në vitin 2004 u dhanë disa fonde për rehabilitimin e tyre, por zoti Kuka megjithëse ka qenë vetë në drejtim të sporteve në bashki për disa vite radhazi, nuk thotë kush i shpërdoroi, që të mos themi fjalën e keqe i vodhi. Këto duhet të kritojë z. Kuka e jo të bëjë teori pse po e përgojojmë rininë, atë rini që sulmon natën urgjencën për të marrë qetësues, sepse pinë drogë në vend që të stërviten në palestrat që mungojnë. Z. Kuka duhet të thotë përse hesht pallati i kulturës “Tekstilisti”? Pse nuk bëhet merak bashkia ta kthejë në identitet e të ngrejë një trupë amatore që të japë shfaqje siç bën trupa e portokallisë? Po të organizohet një trupë e tillë, keni për të parë se harxhet do t’i nxjerrë vetë me shfaqjet e saja. Por fillimisht do ndihmën e bashkisë e jo të qeverisë së madhe e të ministrisë. Ne nuk na mungojnë mjediset, por kujdesi për t’i mirëmbajtur ato, sepse janë vjedhur 8 vjet me radhë.
Dhe për shkrimin e fundit të z Nezir Vrapi, i cili trajton një problem të rëndësishëm me një titull e formë intersante e të gjetur kur deklaron solemnisht se këtë vit gati një vit pas ardhjes në pushtet të demokratëve, Andon Ledhët kanë “ikur refugjatë” nuk janë më të pranishëm nëpër shkolla e në drejtori arsimore apo në Ministri. Z. Nezir duhet të shkruante me të mëdha se merita për këtë është e ministrit të arsimit z. Pollo. Është meritë e kryeministrit Berisha, që ia ka caktuar zero tolerancën korrupsionit në çdo fushë, midis tyre dhe në arsim. Me këtë shkrim z. Vrapi kushdo e kupton se Andon Ledhët e parë u zhdukën nëpër ministri, ishin këta të mëdhenjtë që kishin pjellë Andonët e vegjël. Ngeli shterpë “nëna” e Andon Ledhit se nuk u mbars më që nga ministria e deri në drejtoritë asimore e drejtoritë e shkollave. Sa të jetë PD-ja në qeverisje dhe në drejtim të qeverisë burri i papërlyer Sali Berisha, Andon Ledhë nuk do të ketë.

Bujar Orizaj

Titujt kryesore

Kur ajri bëhet pis nga zhurma dhe vulgariteti

Pensionisti masakron kushëririn

Helmojne çezmen e fshatit

Kronika e javes shkurt

Nëpër faqet e gazetës “Lajmëtari”

Trupa e teatrit të kukullave në takimin evropian të Pogradecit

Intervistë me z. Shkëlqim Hysi, kryetar i komanduar i degës së PD-së Berat

Eno Bendo Fitues i Medaljes së Bronxit

Nëpër faqet e gazetës “Lajmëtari”

Lajmetari:31 07.2006. |top | Commente | Printo