Home Info Na shkruani Foto nga Berati Lajmet e tjera Arkiva Forumi i Lajmetarit

 

Familjarët: vrasësit janë gjallë dhe bëjnë pjesë në jetën politike

 

 

Titujt kryesore

Shkëmbi i Goricës bën apel

Editorial

Gjendja në”Goricë alarmante, 3 shkëmbinj kërcënojnë lagjen

Berati ka filluar që të përjetojë mungesën e ujit të pijshëm

Kronika e javes shkurt

Përshpirtje për vëllezërit Pambuku në Kishën e Shën Spiridhonit

Gezhojat e Policanit “shkelen” nga vallezimi

Erisa Maska dhe Albiona Ajazi janë Nderi i Beratit

Përurohet në Librazhd memoriali kushtuar dy poetëve të pushkatuar nga regjimi komunist, Genc Leka dhe Vilson Blloshmi

Mundësit në dy kampionate në vende nderi  

HOME NEWS KULTURE

Përurohet në Librazhd memoriali kushtuar dy poetëve të pushkatuar nga regjimi komunist, Genc Leka dhe Vilson Blloshmii

Bardha Nergjoni

Nderim për martirët e demokracisë, por edhe
thirrje për vënien në vend të drejtësisë. Ky ishte
mesazhi i përcjellë në Librazhd gjatë ceremonisë së përurimit të memorialit kushtuar dy poetëve të pushkatuar nga regjimi komunist në vitin 1977, Genc Leka dhe Vilson Blloshmi. Në ceremoninë e prerjes së shiritit mori pjesë Presidenti i Republikës, Alfred Moisiu, ministri i Turizmit, Kulturës, Rinisë dhe Sporteve, Bujar Leskaj, por edhe të afërm të poetëve. Këta nuk kanë rreshtur të kërkojnë të vërtetën prej shumë vitesh sidomos në ditët e demokracisë. Të mallëngjyer në ditën e ceremonisë për përurimin e memorialit kanë vazhduar me akuzat e tyre. Ministri Leskaj u bëri një thirrje të hapur shkaktarëve të tragjedisë së 30 viteve më parë, për të dëshmuar.
“Unë sot dua t’ju kumtoj një mesazh kumbarëve të tragjedisë Blloshmi-Leka: Pranoni turpin! Natyrisht, sipas besimit sektant që keni... rrëfehuni... që bashkejetesa jonë e imponuar të marrë një kuptim”, - tha Leskaj.
Ndërsa presidenti Moisiu shtoi: “Nderimi ynë nuk është ftesë për hakmarrje, përkundrazi, shërben për të vendosur në vend një të drejtë të mohuar historike. Përmes këtij akti shtetëror që simbolizon edhe dhënien e drejtësisë morale, ne u përcjellim brezave të rinj mesazhin se e kaluara nuk duhet harruar”.
Vëllai i Vilsonit Blloshmit, Bedriu, kujtoi edhe një herë se autorët e këtij krimi janë gjallë.
“Ata janë në jetën politike, në parlament, në insitucione. Nuk do të rreshtim së kërkuari të vërtetën”. Bedri Blloshmi kujtoi momentet kur trupat e dy të rinjve u zhvarrosën vite të shkuara afër përroit ku ishin ekzekutuar. “Të dy nga Bërzeshta, të dy të muajit mars, të dy mësues, të dy poetë, të dy u arrestuan, të dy u gjykuan, të dy lidhur dorë më dorë u pushkatuan më 17 korrik 1977, të dy bashkë i vendosi dhe koha përjetësisht. Bashkë i gjeta tek humnera që quhet “Përroi i Firarit”, aty ishte dhe plumbi që u mori jetën. Aty përqafuar, me sa kuptova nga skeletet. I pari duhet të ishte vrarë Vilsoni. Në krah kishte kushëririn dhe kolegun e vet Gencin. Skeleti i dorës së djathtë i Vilit ishte përmbi gjoksin e shkrirë të Gencit dhe atje i gjeta duke biseduar bashkë të sigurt që askush nuk mund t’ua prishë qetësinë. Koha ecën dhe nuk harron, e vërteta duhet të triumfojë”. Babai i Vilson Blloshmit, Samiu, në moshë të thyer por mjaft i përmbajtur, falënderonte duke e quajtur këtë ditë një ditë që ka risjellë dhimbjen e 29 viteve të shkuara.
Gjatë ceremonisë aktorë të njohur të skenës Tinka Kurti, Mirush Kabashi dhe Rajmonda Bulku interpretuan poezi nga Vilson Blloshmi dhe Genc Leka, që flasin për mendimin e lirë dhe kritik ndaj sistemit të kaluar. Këtyre poetëve iu akordua po dje nga autoritetet vendore titulli “Qytetar Nderi” të Librazhdit. Memoriali kushtuar poetëve u realizua nga skulptori Sadik Spahija. Është vendosur në një lulishte përgjatë bulevardit të qytetit. Në një sipërfaqe 10m X 5m të veshur me mermer ku janë stampuar vargje të dy poetëve janë vendosur dy kokat në bronz. Dy koka që shprehin dhimbje, njëherësh krenari. Njëra kokë është zgjuar, tjetra fle. Kjo mund të jetë edhe gjendja se si janë gjetur të varrosur trupat. Ky memorial ka kushtuar 700 mijë lekë të reja dhe baza e dy kokave në bronz është financuar nga bashkia e Librazhdit.

 

Lajmetari 10.07.2006. |top | Commente | Printo