Berat- Editorial 137-prill- 2006

Parlamenti i qytetit në fund të mandatit

Janë muajt e fundit të mandatit të parlamentit të qytetit tonë, këshillit të bashkisë. Kanë kaluar afro tre vjet në karriget e nderuara si përfaqësues të qytetarëve. Ky këshill, natyrisht ka marrë vendime mjaft të rëndësishme në të mirë të përmirësimit të jetës së banorëve të Beratit. Aty është diskutuar, është debatuar dhe në fund është marrë vendim, në shumicën e rasteve me forcën e kartonave. Këshilltarët socialistë kanë qenë shumicë gjatë dy mandateve të qeverisjes vendore, ndërsa demokratët dhe disa këshilltarë afër tyre kanë qenë në opozitë. Për një banor të vëmendshëm ky këshill ka bërë një jetë rutinore, pa veprime të guximshme, pa nisma kurajoze në të mirë të qytetit dhe qytetarëve, pa këmbëngulje për të ndryshuar, për t’i dalë ballas së keqes. Në përgjithësi ky këshill ka miratuar ose ka kundërshtuar pa u thelluar, pa e vrarë shumë mendjen, madje në shumicën e herës pa u mbledhur edhe komisionet e këtij këshilli. Ende nuk kemi vendime që të jenë hartuar nga këshilltarë të veçantë, vendime që për nga rëndësia në jetën e qytetit, mund të mbeteshin si vendime me emrin e këshilltarit formulues. Këshilli i bashkisë nuk mundi të ndalë ndërtimet pa leje, nuk mundi të luftojë papunësinë dhe varfërinë e këtij qyteti, nuk mundi të rriste qytetin shpirtërisht nëpërmjet politikave kulturore dhe artistike, nuk mundi të siguronte shërbime sasiore dhe cilësore për qytetarët, nuk mundi të ndikonte për ta bërë më njerëzor shërbimin shëndetsor, nuk mundi të siguronte një shërbim arsimor cilësor, nuk mundi të siguronte më shumë ujë të bollshëm dhe të pastër në rubineta, nuk mundi të siguronte më shumë ndriçim në rrugë dhe rrugica. Disa këshilltarë ende nuk janë as vetë të vetëdijshëm se përse janë ulur në ato karrige të nderuara.
Në zgjedhjet e zhvilluara për qeverisjen vendore në vitin 2003 pati mjaft përfolje për manipulime me votat e qytetarëve. Disa këshilltarë u zgjodhën me telefon celularë në çastet e fundit, duke i njollosur zgjedhjet dhe duke bërë pis karriget e nderuara të parlamentit të qytetit.
Tani po afron koha e rinovimit të kreut të bashkisë dhe këshillit bashkiak. Qytetarët e vëmendshëm kanë regjistruar në kujtesën e tyre punën e kësaj bashkie dhe të këtij këshilli dhe kur të vijë dita e votimit do të bëjnë korrigjimet e duhura, natyrisht në të mirë të qytetit, në të mirë të banorëve të tij.

Yzedin Hima

Lajmetari: 24.04.2006. |top | Commente | Printo

Titujt kryesore

Parlamenti i qytetit në fund të mandatit

Kundërshtohet zhvendosja e spitalit Obstentrik-Gjinekologjik

Vidhet një dyqan para komisariatit të policisë

Kronika e javes shkurt

Bogova, burimi i rrezikuar

Uji i ndotur rrezikon mbylljen e 7 ujësjellësve

Avokati i Popullit në Berat

Më në fund bashkia e Beratit me këshill kulture... të paligjshëm

Berati, kronika e jetës qytetare

E papritura
Në kujtim të Vexhi Buharasë)

Erzeni – Tomori, “paqe nën ullinj”

Bilardistët e “Tomorit” në kampionat

Parlamenti i qytetit në fund të mandatit