Home Info Na shkruani Foto nga Berati Lajmet e tjera Arkiva Forumi i Lajmetarit

.

Foto: P.Zoto

 

Titujt kryesore

Matura Shtetërore, akt reformues i shkollës sonë

Editorial

Zbardhen abuzimet me tokat

Kronika e javes shkurt

Në hetim autori i mesazheve të dashurisë

Ujësjellësi i Bogovës shpallet objekt i rëndësisë së veçantë

Kryetari i qarkut Pelivan Shatri zgjidhet nga socialistët e fshatit

A janë bërë reforma demokratike në Bashkinë e Beratit?

Profesor Doktor Feçorr Agaçi me një botim të ri

Promovohet libri “Kapiteni që luante me vdekjen”

“Tomori”, humbja që kushton shtrenjtë

HOME NEWS KRONIKA

A janë bërë reforma demokratike në Bashkinë
e Beratit?

Kaluan më shumë se dy vjet kur Partia
Socialiste fitoi zgjedhjet lokale në Berat.
Me një demagogji të pashembullt dhe me premtime që asnjëherë nuk u realizuan, ajo vazhdon të drejtojë duke mos i sjellë Beratit asgjë të re, përveçse varfërisë dhe papunësisë masive.
Por unë do të trajtoj një aspekt shumë të rëndësishëm, atë të reformave në një sistem demokratik. Më tërhoqi vëmendje ristrukturimi që u krye. Kryetari i sapozgjedhur ndërmori një fushatë, gjoja me emrin reformë, për të zëvendësuar njerëzit e mëparshëm me persona kompetentë dhe të kualifikuar sipas tij.
Pashë lajmërime pa fund për shtim organikash ku ishin vendosur dhe kriteret që duhet të ketë një njeri për të hyrë në bashki si punonjës i kualifikuar dhe me status civil.
Në të shumtën e rasteve kërkohej një mesatare pesë, pastaj vinin të tjerat, si përvoja e punës. Dhe kryetari aktual i bashkisë pas shumë konkurseve të kryera, më në fund e përzgjodhi kopenë e tij. Zgjodhi njerëz me mesatare pesë të ardhur nga kombinati “Mao-Ce Dun”.
Zgjodhi njerëz që i qëndruan besnikë për fushatë elektorale.
Zgjodhi njerëz mediokër dhe injorantë, aspak të përshtatshëm për pozicionin e tyre në bashki. Kjo ishte reforma që u krye.
Një shtim organikash i pafund dhe pakuptim që thithin nga taksat e qytetarëve rroga të larta. Një kope e tërë me inxhinierë, të cilët janë katandisur të merren me prishjen e gardheve apo qymezeve afër pallateve të banimit.
Por nuk ka sesi, nga persona dikur me një të kalaur të hidhur të ndërmerren reforma demokratike.
Nuk ka sesi nga persona, dikur sekretarë në një organizatë rinie, të kthehen në punonjës civilë në një sistem demokracie.
Decentralizimi i pushtetit lokal ka ngelur vetëm në letër, një teori e vdekur dhe pa asnjë vlerë.
Po e pyes kryetarin e bashkisë: A është dënuar ndonjëherë korrupsioni me tenderat, objektet e të cilave kanë dalë jashtë përdorimit? A është kryer një reformë e drejtë në sistemin e taksave, me qëllim mosshpërdorimin e tyre? A janë analizuar shpenzimet që bëhen nga dega e financës? Çfarë është bërë për ndërmarrjet që varen direkt nga bashkia, me qëllim që ato të jenë më efikase në shërbim të qytetarëve? Transporti urban është në një gjendje të mjeruar. A është zvogëluar numri i familjeve në ndihmë sociale? A është demokratizuar sistemi i informimit të publikut?
Kryebashkiaku jep konferenca shtypi nga vila e tij private, njëlloj sikur të ndodhej në Korenë e Veriut, apo në Irakun e ish-Sadam Hysenit. Ai akoma nuk e kupton që demokracia është alternancë, është zhvillim, por edhe shërbim ndaj qytetarit.
Por le t’i kthehemi reformës. A nuk duhen rishikuar gabimet e pafalshme me fondet e sipërmarrjeve publike, që jo vetëm thithin para nga shteti, por dhe abuzojnë me to? Do t’ju them vetëm një fakt që më ka tronditur gjatë punës sime në bashki. Vetëm për dekorin e qytetit të Beratit, një gjë krejt pa vlerë, për banderolat dhe parrullat partiake shteti shpenzonte afro 5 milionë lekë të vjetra në vit.
Kur afrohej festa e Vitit të Ri jepeshin me një tender afro 5 milionë lekë të vjetra, gjoja për të zbukuruar qytetin dhe për të vendosur ca llamba ndriçuese në Urën e Goricës, të cilat dilnin jashtë përdorimit brenda një nate. Ish-paraardhësi i zotit Nasufi, shpenzonte para për rregullimin e varrezave të dëshmorëve, në një kohë që qytetit i mungonte sipërfaqja e tokës për shërbimet mortore.
A nuk do të ishte e denjë që këto para të shkonin për të ndërtuar një treg shitje modern për qytetarët? Biznesi, zoti kryetar, nuk ka nevojë për zyra me një ndalesë. Biznesi ka nevojë për ulje taksash dhe infrastrukturë moderne. Por dhe nga ana ideologjike nuk është bërë asnjë reformë. Paraardhësi juaj dhe ju akoma shfaqeni në mbledhjet e veteranëve, jepni dekorata mbas vdekjes duke mos e kuptuar se reformat ideologjike janë po aq të rëndësishme sa reformat ekonomike.
Sikur Veltroni, kryebashkiaku i Romës që i përket të majtës moderne italiane, të merrte pjesë në ndonjë aktivitet të saj, do t’i irritonte pa masë qytetarët që e kanë votuar. Ish - seksionet e dikurshme të komitetit ekzekutiv, janë kthyer sot në “drejtorira” punësimi apo zhvillimi” që nuk kanë asnjë funskion veç thithjes së rrogave të larta, nga qytetarët beratas.
Shikoj me keqardhje që hidhen para për rregullin e trotuareve, që i kanë dhënë Beratit, pamjen e një qyteti të dalë nga lufta në një kohë që trumbetohet me të madhe futja e tij në organizatën e Uneskos. Akoma dhe sot në bashkinë tuaj ekziston koncepti famëkeq “plan” Ndërtimi i teleferikut është një çmenduri tjetër si ato të diktaturës.
Zgjedhjet e përgjithshme të vitit 2005, ndonëse të lira dhe demokratike, patën probleme në listat zgjedhore.
Zyrat e gjendjes civile nuk janë kompetente për të dhënë një shifër të saktë mbi regjistrimin e popullatës dhe mbi të larguarit. Qytetarët beratas enden nëpër këto zyra dhe paguajnë para për të marrë një çertifikatë në një kohë që kartat e identitetit të shpërndara vite më përpara sot kanë dalë jashtë përdorimit. Regjistrat e gjendjes civile janë krejtësisht të amortizuar. është për të ardhur keq, që në qytetin e Beratit nuk është ndërtuar një qendër rajonale moderne, ku të përfshihen të gjitha shërbimet si ai i gjendjes civile dhe i përkrahjes sociale, në mënyrë që t’u shërbehet me shpejt qytetarëve. Por mbas tetë vitesh korrupsion dhe keqqeverisje, shqiptarët i thanë ndal korrupsionit. Ekziston një proverb i një filozofi të pamshëm grek: “Korrupsioni rrëzon perandorira”. Korrupsioni i rrëzoi socialistët nga piramida e përjetshme në të cilën pretendonim.
Do t’ju sjell lexuesve në kujtesë fjalët e shkrimtarit Ismail Kadare. Për ne shqiptarët u ishte krijuar opinioni në perëndim se jemi një popull pa vlera, pa dinjitet dhe që e meritojmë qeverinë komuniste. Proceset demokratike të vitit 1990 dhe rrëzimi i bustit të Enver Hoxhës treguan se shqiptarët janë një popull me vlera dhe që nuk e duan diktaturën. Zgjedhjet e 3 korrikut u fituan nga Partitë Demokratike. Por kësaj partie në këto momente të vështira i duhet një dorë e hekurt qeverisjeje, për të luftuar korrupsionin, për të luftuar nepotizmin aq të rrezikshëm në demokraci. Asnjëherë ajo nuk duhet të harrojë premtimin para shqiptarëve “Është koha për ndryshim” sepse çdo harresë do të bënte që shqiptarët të humbnin besimin te vota e dhënë. Një humbje e kësaj force në elektorat do të përbënte një eliminim nga skena politike. Kur flasim për reforma, nuk është fjala për revanshe politike, por për të zgjedhur njerëz të aftë dhe demokratë të vërtetë. Asnjëherë ajo nuk duhet të bëhet pre e gabimeve të qeverisjes së viteve 1992-1996, ku qeverisi me ligje komuniste duke nëpërkëmbur të drejtat dhe liritë e individëve. Partia Socialiste tashmë e dalë me opozitë, jo vetëm nuk bën rolin e opozitës, por praktikimi i parimit një anëtar një votë, ndonëse në dukje demokratik, nuk e ka shkëputur nga klanet mafioze dhe dominimi i më të fortit. Po e mbyll artikullin me fjalët e presidentit amerikan Xhoxh Bush, në ditën e betimit para kombit amerikan:
“Ne i urrejmë tiranitë e përhereshme, ashtu sikurse urrejmë dhe skllavërinë e përhershme. Kur ju të ngriheni në këmbë për lirinë tuaj, ne do të qëndrojmë gjithmonë pranë jush.”
Dhe sot më shumë se kurrë, Amerika dhe Evropa është pranë nesh për të ndërtuar demokracinë për të ndërtuar mirëqenien dhe për t’ju aferuar sa më shpejt kësaj Amerike gjigande dhe Evrope të qytetëruar.
Polikseni Zoto

Lajmetari:03.04.2006. |top | Commente | Printo