Berat- kronika shkurt 2006

Jane konstatuar në ditën e djel disa thasë me zogj pulash të rritur të flakura nëpër shkurre përgjatë rrugës nga “Qafa e Pazianit” deri te “Përroi i Bovës”në afersi të komunës Roshnik , rreth 10 km larg nga qyteti i Beratit. Shpendët e ngordhur, pasi janë futur nëpër thasë, janë shpërndarë përgjatë rrugës Duhanas-Roshnik . Banorët e zonës pasi kanë konstatuar se thasët e hedhur përgjatë përroit kanë qënë me zogj të rritur pule, të trembur dhe në panik kanë njoftuar kryetarin e komunës Roshnik z.Adriatik Serani, i cili më pas ka komunikuar me specialistët e bujqësisë, ushqimit dhe mbrojtjes së konsumatorëve. Dy nga specialistët e kësaj drejtorie kanë shkuar në vendin ku janë konstatuar zogjtë e hedhur dhe më pas ata kanë marrë disa prej tyre për t’u bërë analizat në laboratorin qëndror të Institutit të Kërkimeve Veterinere (IKV) Tiranë. Drejtori i bujqësië, ushqimit dhe mbrojtjes së konsumatorëve z.Pirro Bici, shprehet: “Këta zogj kanë ngordhur në ndonjë pulari dhe më pas janë hedhur në këtë vend. Në raste të tilla të ngordhjes së shpendëve menjëherë duhet të njoftohet pranë drejtorisë sonë dhe më pas shpendët e ngordhur duhet të groposen dhe digjen. Ngordhja e këtyre shpendëve mund të ketë ardhur nga virusi i quajtur “pseudopest”, por ne do të kryejmë analizat përkatëse, pasi shenjat e kësaj sëmundjeje thuajse janë të njejta me gripin e shpendëve të quajtur influenca aviare ose H5N1".
Gjithsesi banorët e komunës Roshnik janë të mbërthyer nga paniku dhe frika edhe për faktin se këta zogj të flakur shërbejnë edhe si ushqim për kafshët shtëpiake apo edhe atyre të egra dhe kësisoj virusi mund të marrë përmasa edhe më të mëdha.
“Ndaj kërkojmë që të mblidhen këta zogj, të groposen dhe më pas të digjen.Po kështu kërkojmë që të dalë përgjegjësia dhe të identifikohet personi i cili i ka shpërndarë këta zogj përgjatë rrugës deri në afërsi të fshatit duke u bërë rrezik serioz jo vetëm për shpendët, por edhe për njerëzit”-përfundoi z.Serani.

Lajmetari: 27.02.2006. |top | Commente | Printo