Berat- Editorial Yzedin Hima shkurt 2006

Shpërdorimi i lirisë për ne qytetarët shqiptarë është i dhimbshëm, krejt si shpërdorimi i ujit në mes të shkretëtirës përvëluese. Ndërsa përdorimi i drejtë i lirisë do të na bënte edhe më të lirë. Po si e kemi përdorur lirinë në këto vite ne, qytetarët e një vendi, ku liria ka munguar krejtësisht në më të shumtën e kohës?
Jemi shpërdorues të krisur të saj, ndonëse asnjëherë nuk kemi qënë plotëisht të lirë, në kuptimin sipëran të kësaj fjale (Si mund të quhesh i lirë kur nuk mund të kalosh kufijtë e vendit tënd të tkurrur? Si mund të quhesh i lirë me gjendjen mizerabël ekonomike, me një nivel të mjerë të qytetarisë, me një mentalitet gjerësisht të vjetëruar?). E shpërdorim lirinë si lojtarët e bixhozit të hollat. Po si?
Në vend të ulemi të studjojmë, e kemi më lehtë t’i fusim mësuesit, pedagogut një dorë parash për të regjistruar një notë pozitive. Në vend të punojmë tokën , të rritim pemë dhe perime, i japim zyrtarit të kalbur një trastë me para dhe blejmë një diplomë për t’u bërë “mësues”, “mjek” a “inxhinjer”. Në vend të ngremë probleme në tubime e media për të përsosur institucionet, shkruajmë letra anonime (edhe kur vendos emrin poshtë letrës, për shkak të anonimatit të atij emri, letra është thjesht anonime). Në vend të kërkojmë që kudo në zyra dhe institucione të mbretërojë ligji, bëjmë një mijë e një presione për të shkelur ligjin në të mirë të përfitimeve tona të paligjshme. Në vend të organizimeve qytetare, preferojmë organizimet tribale: klanore dhe fisnore, madje dhe fetare. Në vend që të inkurajojmë nismat reformuese, i shkurajojmë nismëtarët me klimën e ftohtë që krijojmë rreth tyre etj etj.
Nëse do ta përdorim lirinë tonë relative në të mirë të vetes tonë, në të mirë të vendit, atëherë kjo liri do të na bënte edhe më të lirë dhe vendin tonë edhe më të jetueshëm. Banorët e vendeve të qytetruara e kanë përdorur lirinë si një nga pasuritë më të cmuara, shumë më të cmuar edhe se të gjitha pasuritë mbi dhe nëntokësore dhe liria ka punuar në mënyrë të shkëlqyer për ta.dhe për brezat që vijnë. Po ne? Ne banorët e këtij trualli nuk jemi aq të kamur me atë pasuri që thirret liri, pra nuk jemi aq të lirë sa shpërdorim në mënyrë skandaloze lirinë.
Y. HIMA

Lajmetari: 20.02.2006. |top | Commente | Printo