Berat- Editorial Yzedin Hima shkurt 2006

Kujdes! Këtu falsifikohet gjithçka!

Një task forcë kundër falsifikimit
Një nga rreziqet që e kërcënon seriozisht shoqërinë e sotme është fenomeni i falsifikimit. Qytetarët shqiptarë janë në rrezik të madh nga ushqimet e falsifikuara që mund të vrasin jetën e tyre. Mallrat vërshojnë ngado. Inspektorët tanë edhe në mos qofshin të korruptuar, nuk kanë ose eksperiencën e duhur, ose mjetet e nevojshme për të kontrolluar ushqimet tona të përditshme. Ne blejmë shtrenjtë mallra pa cilësi, me etiketa false, ne blejmë lirë mallra të skaduara, ne blejmë veshje “made in Italy” të prodhuara në Maminas dhe diku tjetër në lindje të Italisë.
Ndodh i njejti fenomen me gjithçka që konsumojmë. Vetëm Zoti na ruan e Zoti na ruajt!
Po falsifikimi nuk është problem që përfundon te ushqimet dhe mallrat që konsumojmë. Falsifikimi ka mbërthyer të gjitha sferat e egzistencës së shoqërisë shqiptare. Para nxënësve del përditë një individ që ka vetëm 6 klasë, por në dosjen e personelit figuron me universitet, me notë mesatare 9 e lart. Nuk di të shkruajë dhe të flasë drejt shqip, por në dosjen e tij gjenden tri vërtetime që tregojnë se zotëria apo zonja zotëron tri gjuhë të huaja, për të mos folur pastaj për trainimet që ka bërë jashtë dhe brenda vendit. Merreni me mend se çfarë shërbimi arsimor iu ofrojmë qytetarëve me të tillë “kapacitete” që gjenden me shumicë në shkollat e zonave rurale dhe madje edhe në shkollat mu në qendër të qytetit! Dikush mund të pyesë: Po pse nuk verifikohen këto dokumenta? Është një punë e vështirë me të cilën institucionet duhet të merren.
Po nuk është vetëm “mësuesi” i fëmijës tuaj prej plastmasi. Prej plastmasi është edhe polici, i cili fshehur mëson abetaren për të fiksuar shkronjat e shqipes që të mos mbetet si guak para shoferit të dehur me emrin Xhemal, thjesht se nuk e kishte fiksuar atë xh-në e mallkuar. Në dokumenta ky polic figuron me tre vjet universitet, madje për gjuhë e letërsi shqipe. Prej plastmasi është edhe shefi i tij që “mbaroi” juridikun në këmbim të një thesi me para. Fals është edhe ai mjeku që, veshur me bluzën e bardhë, pozon si Hipokrati, por e vetmja veprimtari “intelektuale” e përditshme e tij është të numërojë lekët e vjela përditë nga pacientët. Fals është edhe ai burri me shkollë fillore me kohë të pjesshme që pozon me një çantë dhe një kartë gazetari, por që koka e tij nuk funsionon as për të formuar një tekst me pesë- gjashtë fjali. Fals është edhe ai grupi që pi kafe tërë ditën në të njejtën kafene dhe pozon si grupimi më i rëndësishëm, sjellës i demokracisë në qytet dhe më gjerë,qëndrestarë të paepur kur dihet se midis tyre nja dy – tre kanë qenë spiunë të përvuajtur të sigurimit famëkeq. Fals është edhe ai politikani lokal shpatëzhveshur, që korr majtas e djathtas, ndërsa ka harruar edhe vetë se para ca vitesh ka qenë një trafikant i mbërdhihur droge në parqet e ngrirë të Zyrihut. Fals është edhe ai “doktor-profesori” që i mori këta tituj me studimin për dobinë e thellimit të luftës së klasave për të forcuar diktaturën e proletariatit.(As që i shkoi ndër mend t’i dorëzonte a t’i flakte ata tituj e grada kur diktatura e proletariatit pushoi së qëni. Madje sot, kur shkruan ndonjë artikull për demokracinë, nuk harron të vërë para emrit titujt.). Fals është edhe ai fjalimi mbreslënës i atij deputetit që e dërrmoi pozitën (opozitën) dhe në kafene i thotë kolegut opozitar: “Na e do puna, se ajo seance transmentohej edhe në TV dhe ky derr mileti e do shumë sherrin.”
Po si të dalim nga ky det falsifikimesh ku zhytemi çdo ditë?

Yzedin HIMA

Lajmetari: 16.01.2006. |top | Commente | Printo

Titujt kryesore

Kujdes! Këtu falsifikohet gjithçka!

SHUHET FAMILJA ,EKZEKUTOHET FËMIJA 2 VJEÇ DHE NËNA E TIJ SHTATZËNË

Hoxha –Hodaj në balotazh për kreun e PS-së

ZJARRI SHKRUMBON RRETH NJE HEKTAR ME FIQ

NDERTIMET PA LEJE PUSHTOJNË TOKAT BUJQESORE

PERSONALITETE TË SHKENCËS DHE KULTURËS NË KRT-në E BERATIT

Kam mall të shikoj gjyqtarë të Beratit në gjykime

Kujdes! Këtu falsifikohet gjithçka!