Lajmetari i Beratit-editorial Y.Hima janar 2006

Në Berat ka kohë që po shqepen trotuare, rrugica, sheshe dhe rrugë, Qyteti është kthyer në kantier pune. Hapen kanale e gropa dhe vendosen tuba me linjat e tensionit të lartë 20 mijë kilovolt. Eskavatorët dhe punëtorët me kazma dhe lopata e kanë kthyer qytetin në një katund të përbaltur kur bie shi dhe tërë pluhur në kohë të thatë, Thuhet se vendosja e kësaj linje tensioni do të zgjidhë mjaft probleme të furnizimit të banorëve me energji elektrike. Mrekulli! Po si do të bëhet me kanalet në mes të lagjes, në mes të rrugës , në mes të qytetit? Si do të bëhet me trotuarin nga Ura e Goricës deri te Dardha? Ky trotuar ka fare pak kohë që u shtrua i ri. U hodhën aty miliona e miliona lekë që dolën nga xhepat e qytetarëve Bashkia e Beratit para disa vitesh reklamoi në media plane zhvillimi deri në vitin 2015. Si ka mundësi që nuk paska parashikuar vendosjen e linjës elektrike pas 3 vitesh? U shtruan rrugë në qytet ku u hodhën qindra milionë dhe tani ato rrugë u shqepën sërish, A nuk mund të vendoseshin tubat paraprakisht sic ndodh kudo në botë? Kaq dritëshkurtër janë urbanistët tanë?
Nuk është hera e parë që në Berat shkatërrohet ajo cka u ndërtua me shumë mund e para. Të gjithë banorët janë dëshmitarë, kur ende pa u përuruar një rrugë shqepet, sepse ujësjellësi do të mermetojë tubacionin e kalbur, ende pa kaluar qytetari i parë në një trotuar, ai shkatërrohet, sepse telekomi kishte harruar të fuste linjën e tij.
Me c’duket në këtë vend njeri i bie gozhdës e tjetri patkoit. Në fakt po të shohësh me kujdes në historinë tonë të trishtueshme (të më falin “heronjtë”) vëren se nuk janë të rralla rastet kur atë që është ndërtuar me mund nga një palë e ka shkatërruar brenda ditës pala tjetër, Është mallkim apo mendjeshkurtësi?
A ka studime të pjesshme dhe tërësore për një qytet si Berati? Nëse ka mos vallë bëhen investime pa përfillur këto studime? A do t’i shkojë nëpër mend ndonjë këshilltari bashkie për të propozuar një komision hetimor nga parlamenti i qytetit për të hetuar se si hidhen paratë e qytetarëve në vrimat e zeza të padijes apo të korrupsionit? Qytetarët shohin me habi se si shqepen trotuarë, rrugë e rrugica. Askush nuk del në media dhe t’u shpjegojë atyre pse ndodh e përsëritet kjo dukuri. Ndaj, kur shohin atë që me mund e para u ndërtua dje dhe po, prishet sot mërmërisin : “E kemi mallkim nga … “

Yzedin Hima

Lajmetari: 30.01.2006. |top | Commente | Printo