Lajmetari Online

E Merkure 28 Janar 2004 Nr.4 (29)

na shkruani

Intervistë me Dritan Haznedarin, kryetar i degës së PD-së Berat

-Si e gjykoni rezultatin elektoral të PD-së për zgjedhjet lokale të 12 tetorit në Berat?

-Rezultatin elektoral të PD-së në zgjedhjet lokale të 12 tetorit do ta quaja inkurajues. Ka kohë që shoqëria shqiptare ka mbetur në një "gropë të zezë" të krimit, korrupsionit dhe pasigurisë, ka kohë që Berati renditet në qytetet tipike të vuajtjes së skamjes. Vuajtjes që vjen nga moslëvizja, vuajtjes që vjen nga mungesa e perspektivës, vuajtjes që vjen nga papunësia, largimi i trurit, miqve dhe shokëve që dhimbshëm e shohin si të pamundur ndryshimin. Nuk ka formulë magjike për ndryshimin e këtij realiteti, por ka një metodikë. Kjo metodikë është pjesëmarrja në jetën shoqërore. Vërtet ne thërrasim se votimi është një e drejtë, por gjithashtu nuk duhet të harrojmë detyrimin për ta ushtruar këtë të drejtë me përgjegjshmëri. 32% ishte pjesëmarrja në zgjedhjet e 12 tetorit dhe kjo falë angazhimit të shtetit me gjithë strukturat e tij për të dekurajuar pjesëmarrjen dhe përjashtimin e afro 4000 qytetarëve nga e drejta kushtetuese për votim. Personalisht kam bindjen se nëqoftëse zgjedhjet do të zhvillohen brenda standarteve që i përcaktojnë ato të lira e të ndershme, padyshim sot do të kishim një tjetër kryetar bashkie dhe tjetër këshill.

-A pati probleme struktura e degës gjatë fushatës dhe ditën e zgjedhjeve?

- Në një fushatë elektorale natyrshëm strukturat, apo skema funksionale, shfaq probleme, probleme të cilat janë të larmishme dhe variabël nga një fushatë në tjetrën, pasi variabël dhe diabolikisht të larmishme janë edhe format e manipulimit që aplikohen nga administruesit e procesit. Duke neglizhuar problematikën, për mua pesonalisht, por edhe për çdo qytetar me vlerësim të kthjellët për vështirësitë me të cilat përballet opozita, dominante është mirënjohja dhe vlerësimi për punën, angazhimin dhe në shumë raste edhe sakrificën e atyre që përbëjnë strukturat e PD-së. Nuk është aspak e lehtë të jesh pjesë e këtyre strukturave, të cilat duhen të përballen me gjithë trashëgimininë malinje të vjetër e të re të këtij pushteti. Nuk është aspak e lehtë të ruash kompetitiv një formacion politik kur pushteti, përveç shantazhit dhe persekucionit, përdor edhe shpërndarjen e privilegjeve, për të zhveshur partitë politike opozitare nga parimet e tyre etike dhe fuqia intelektuale.

-Çfarë probleme kryesore keni analizuar nëpër struktura pas rezultateve të 12 tetorit?

-Në kuvendin e degës besoj se do të analizohen edhe problemet që u vunë re gjatë fushatës së fundit. Sidoqoftë, dua të theksoj, pas insistimit tuaj, se problemet që reflektojnë strukturat e PD-së janë minore në krahasim me problemet dhe deformimet që po pëson vetë sistemi i vlerave që ne pretendojmë të ndërtojmë. Tendenca për të vlerësuar në frymë kritike strukturat e një partie si PD-ja ndihmon në zhvillimin dialektik të saj, ndërsa mania për të justifikuar realitetin, të keqen që na ka pllakosur me defektet apo problemet që shfaqin strukturat e PD-së, është ekuivalente me shmangien e një hetimi mbi një krim drejt një piste të rreme. Lavdërimet dhe mbështetja aktive duhet t'u jepet atyre që luftojnë për qeverisje të hapur dhe të ndershme, shpesh kundër elitave financiare të vendosura në këtë vend.

- Tani po organizoni konferencën e zakonshme të degës. Cilat janë disa nga synimet tuaja në këtë strukturim?

-Së pari, dua të saktësoj se nuk bëhet fjalë për ristrukturim, pasi ai u krye gjatë fushatës së qershorit 2003. Synimi kryesor në këtë kuvend do të jetë zhvillimi i një procesi zgjedhor transparent, të ndershëm dhe demokratik. E veçanta e këtij kuvendi konsiston në faktin e eleminimit të përzgjedhejs së kryesisë së degës nga ky forum. Me këtë akt kryesia e PD-së vazhdon të plotësojë autoritetin vendimmarrës të nëndegëve.

- A ka lëvizje për freskimin e seksioneve, nëndegëve me të rinj dhe intelektualë?

-Konceptimi i "freskimit" me të rinj dhe intelektualë nëpërmjet fushatave rekrutuese nuk është bashkëkohor, madje ngjason me fushatat e pranimeve në parti dikur. Po të informoheni për strukturat drejtuese të nëndegëve, kryetarët, sekretarët dhe kryesitë e tyre, do të konstatoni se stimulimi i përfaqësimit të të rinjve dhe intelektualëve në struktura tashmë është një filozofi dominante në PD, filozofi që nuk kufizohet në fushata. Gjithashtu dua të theksoj se afrimi i të rinjve si në moshë apo në anëtarësim nuk do të ketë dhe nuk ka pse të kuptohet apo shoqërohet me largim të të "vjetërve". Ata që i qëndruan pranë PD-së në momentet e vështira që kemi kaluar dhe kalojmë, përbëjnë një vlerë jo vetëm për PD-në, por kurajua, guximi, vullneti dhe idealizmi i tyre ishin për një periudhë të vetmet barrikada të sistemit, të vetmet mburoja të demokracisë ndaj dyndjes sovjeto-mafioze.

- A do të kandidoni për kryetar të degës?

-Iniciativa, pas konsumimit të mandatit, unë gjykoj se u takon atyre që më besuan 3 vite më parë, miqve, shokëve dhe shumë anëtarëve që mbështetën kandidimin tim.

- Përveç jush a janë shfaqur kandidatë të tjerë për këtë post?

-Është shpejt për të shprehur një opinion se cilët mund të jenë kandidatët, por, ajo ç'ka mund të thuhet me siguri është fakti se garave në PD nuk u ka munguar rivaliteti. Nëse do të rifitoni kreun e degës, çfarë do të ndryshoni në drejtimin e degës së PD-së? Siguroj"Lajmëtarin" se, në momentin e parë që do të vlerësoj rikandidimin tim si rezultante të një vullneti pozitiv brenda strukturave por edhe të opinionit qytetar, atëherë do të jeni ju të parët që do të njihni platformën time. Ju faleminderit!

LAJMETARI Berat,19.01.2004