Shuhet Ibrahim Kodra
Më 7 shkurt 2006 u nda nga jeta artisti madh shqiptar Ibrahim Kodra.
Në Akademinë e Arteve të Bukura në Brera të Milanos u bënë homazhet për të përciellë piktorin shqiptar, nderim i cili u bë nën kujdesin e lartë të kryetarit të Bashkisë së Milanos, Gabriele Albertini.
Ditën e premte më 10 shkurt, duke përmbushur amanetin e vetë Kodrës trupi i tij i pajetë, pas homazheve në Teatrin e Operas dhe Baletit në Tiranë të miqve , artistëve, Presidentit Moisiu, Kryeministrit Berisha, u pre në vendlindje përballë portës së Kalasë së vjetër të Ishmit.
Për artin humbja ishte e madhe por më e madhe ishte vepra që ai la pas.
Ibrahim Kodra, Jeta.
Lindi në Likmetaj (në Ishëm të Durrësit) më 22.04.1918. Në moshën tre vjeç mbetet jetim, i vdes e ëma (Xhixha) dhe rritet nga gjyshi Shaban. I ati Murati, ishte marinar, njeri që donte detin dhe poezinë. Ibrahimi pati një fëmijeri të vështirë. Punoi si disenjator për një tregetar të qytetit të Durresit, vazhdon studimet në shkollën teknike të Harry Fultzit, ndjek kursin e piktures në shkollën e parë të vizatimit nën drejtimin e skulptorit Odise Paskali, derisa bie në sy të drejtorit të doganave të Durrësit, i cili e ndihmon të futet në oborrin mbretëror ku edhe njohu direkt mbretëreshen Geraldina, e cila më 1938 e çon të studioje në Itali .me një bursë studimi nga Oborri Mbretëror.
Ne Milano ndjek studimet në Akademinë e Arteve të Bukura në Brera. Ndjek kurset e Aldo Caprit e më pas te Carlo Carra, përsa i përke pikturës, ndërsa për skulpturën ndjek kurset e Francesco Messina.
Jep me sukses provimet e pranimit në akademi, e cila ende në atë kohë ishte shumë rigoroze në pranimin studentëve dhe përzgjidhte ata që ishin të destinuar të bëheshin të famshëm. Pas mbarimit të studimeve, dhe mbarimit të luftës së dytë botërore ai përfshihet në lëvizjet artistike të Milanos, “Oltre Guernica”(1945) dhe “Linea”(1947).
Ekspozon së bashku me Piccasso, Dufy, Dali, Modigliani, Ernst, Mattisse e të tjerë personalitete të kohës.
Kodra ngjitet në elitën e artit të Europës.Ka një koleksion të pasur çmimesh, ku mund të evidentojmë: Medalja e Artë e Akademisë Franceze, Qytetar Nderi në shumë qytete të Italisë, çmimi “Ambrogini i Artë” nga Bashkia e Milanos, dhe 1996 Presidenti Berisha i jep titullin e lartë“ Nderi i Kombit”. Vepra e Kodrës, gjëndet në të gjthë botën, rreth 6000 bëjnë pjesë në muze , galeri, e koleksione private.Vepra e tij është pasuri botërore, dhe kombi ynë nderohet me të. Kanë thënë Karriera e tij si piktor do të njihte vetëm arritje dhe njekohesisht edhe fama do të rrezononte talentin e tij. Me 1947 Paul Eluard viziton studion e tij dhe e percakton si: "le primitif d'unë nouvelle civilitation" - "Është primtivi i një qyteterimi të ri".
Me 1948 merr pjesë ne konferencen ndërkombëtare te paqes, ku njihet me Pablo Pikason, takim dhe njohje që e lidh përfundimisht me rrymën e Pikasos, jo si një pasues i thjesht i tij, por si një individualitet i pashtershëm.
Piccasso ka deklaruar:”Mio amico pittore albanese! Una pittura singolare, anche la tua firma e un disegno, come i tuoi quadri” -“Miku im piktor shqiptar! Një pikture e vecantë! Edhe firma juaj është një vizatim, si veprat e tua” "Ai, - shkruan Hans Kinkel ne Stuttgarter Zeitung 1959 - është konsideruar si një prej më të mëdhenjve të gjeneratës së re të piktoreve italianë.
Në pikturat e tij ka një origjinalitet midis lirizmit dhe gjeometrise. Pelqen ngjyren e kaltër që e luan në të gjitha tonalitetet duke e bërë pjesë themelore te shprehjes. Lirizmi i lehtë, është një mënyrë gati "naiv" qe na kujton Paul Klee" -"Lirizem dhe magji, por edhe autenticitet në të cilin drama antike dhe moderne janë në konflikt me njëra tjetrën..." Francesco Carbone. " Me një sinteze kapriçioze, abstragime gjeometrike dhe kompozime piktoreske, Kodra arrin efekte te mrekullueshme të peisazheve detare..." Karl Diemer 1959. Besoj se njohja me vepren e tij ka rendesine e vet, sepse në fund te fundit, është një figure artistke me fame botërore dhe qe i përket universit shqiptar.
Tre vizitat e Ibrahim Kodrës në Berat
Vizitë e parë në Berat, Kodra e bëri në vitet 70-të dhe u prit nga artistët beratas Sotir Capo, Dhimitër Buda dhe Vangjel Papa si dhe miku i tij shumë i ngushtë Dr. Maksut Dërrasa. Me shokun e tij të shkollës në Tiranë, Selam Tepelena nuk e lanë të takohej, edhe pse ai e kërkoi. Në familjen Tepelena ruhet me fanatizëm që nga vitet 30, portreti në laps i Selam Tepelenës, i realizuar nga Kodra në një fiber të dollapeve të konviktit. Në kujtimet e tij Kodra shkruan:- “Në prill të vitit 1996 pranova ftesën e Presidentit Sali Berisha për të bërë një udhëtim njëjavor në Shqipëri. Dhe kështu nga data 20-27 prill të vitit 1996 kalova një javë në Shqipëri, plot ngarkesa,për të bërë një shëtitje të detyruar, të lodhshme po të kënaqshme, i shoqëruar nga bashkëpunëtori dhe miku im Demetrio Patituçi. Nuk mund ta fsheh kënaqësinë e marrjes së çmimit “Nderi i Kombit” Me këtë rast me ndihmën e një helikopteri që më vunë dispozicion autoritetet, munda të vizitoj mbarë Shqipërinë”.
Gjatë kësaj jave më 24 prill 1996 Kodra nuk lë pa vizituar për here të dytë Beratin. Helikopteri mbrin në Kala në mesditë. Kodra shoqërohej nga miku i tij italian Patituçi si dhe poeti Visar Zhiti. Kudo që shkonte ai pritej vetëm nga piktorë, dhe kështu ndodhi dhe në Berat, ai u prit nga artistët beratas Arben Golemi, Agron Polovina, Nezir Ago dhe Kastriot Dervishi. Takimin e pare dhe të vetëm me Kodrën do ta ruaj si një nga takimet më të bukura të jetës time.
Në atë takim Kodra më dhuroi për Galerinë e Arteve “E. Lear” serigrafinë “Paqe në Kosovë”, vepër e cila mban mbishkrimin –“Dhuruar Galerisë së Beratit” dhe gjëndet në fondin e galerisë.
Vizitën e fundit në Berat në gusht 2003. (Kjo ka qënë një vizitë private, i ftuar nga dy bisnesmenë beratas Krenar Merko dhe Ilir Hasani dhe i shoqëruar nga piktori beratas Nexhmedin Musaj, në lokalin “Castle Park”, ku ka lënë edhe autografin e tij të mrekullueshëm.)
Veprat e Kodrës në Berat
Në qytetin e Beratit gjënden disa vepra të Kodrës. Vepra më e rëndësishme që ndodhet në Berat është portreti në laps i Selam Tepelenës që i përket viteve 30-të ,vepër që ruhet në familjen Tepelena. Serigrafia e dhuruar nga Kodra. “Paqe në Kosovë”, gjendet në fondin e Galerisë së Arteve “ Edward Lear”. Një vit më parë nëpërmjet Eltion Valles nga Kuçova, student në Brera të Milanos, i cili prej tre vjetësh punon në studion e Kodrës në Milano, Kodra i dhuroi Bashkisë së Beratit një serigrafi, e cila gjëndet në zyrën e Kryetarit të Bashkisë, si dhe Bashkisë së Kuçovës tre serigrafi. Familja Valle në Kuçovë ka disa serigrafi. Një prej serigrafive ndodhet në pronësinë time (K.Dervishi), dhuruar nga Kodra në Maj 2005

KASTRIOT DERVISHI