Y. Hima

HOME NEWS EDITORIALE

Kriza e identitetit

Në Berat ka nisur fushata e madhe e përzgjedhjes së kandidatëve për kryetarë bashkie dhe këshilltarë bashkie. Ethet kanë përfshirë parti të mëdha dhe parti të vogla. Kur dëgjon se nga x parti janë përzgjedhur 33 kandidatë për kryetar bashkie të lindin dhjetëra pyetje:
Kaq i begatë është ky qytet me intelektualë të klasit, specialistë të fushave?
Një parti me 30 anëtarë ka nxjerrë deri tani 13 kandidatë për kryetar bashkie!?
Në fakt njeriu normal nuk ka pikë entusiazmi kur dëgjon se fusha e vjetër e sportit në Berat është mbushur plot e përplot me ushtarë partiakë, në formacion luftimi për të nisur betejën e madhe për “pushtimin” e bashkisë. Në këtë rreshtim nuk ka një skuadër nuk ka një kompani por... plot një batalion me kandidatë. Nëse do të rreshtoheshin edhe të përzgjedhurit për këshilltarë bashkie, atëherë nuk do të mjaftonte as fusha e vjetër, madje as stadiumi i ri, për të rreshtuar divizionin e këshilltarëve që do të “pushtojnë” këshillin e bashkisë në Berat.
Po nga vjen kjo etje, kjo ethe për t’u zgjedhur kryetar bashkie, për t’u zgjedhur këshilltar bashkiak?
Normalisht qyteti ynë, pas rrjedhjes së fortë intelektuale, me sforcim të madh mund të nxirrte nja dy kandidatë, një nga e majta dhe tjetri nga e djathta. Me siguri edhe këtu dy kandidatë të nderuar nuk do të qenë krejt të arrirë, por do të përfaqësonin edhe nivelin aktual të banorëve të këtij qyteti.
Po nga vjen gjithë kjo zjarrmi që mbërthen turma të tëra dhe i drejton drejt portave të bashksië?
Mendoj se, ndonëse kanë kaluar afro 100 vjet nga rënia e Perandorisë Osmane, mentaliteti ka ndryshuar sa për 10 vjet.
Të gjithë ne pretendojmë të jemi sundimtarë, mëkëmbësa, shefa, komandantë, guvernatorë, vezerirë të mëdhenj në territore pa anë e pa fund. Në fakt kështu ka ndodhur dikur, kur shqiptarët, duke harruar Shqipërinë, sunduan perandorinë.
Bashkia e Beratit për stërnipërit e ish-sundimtarëve të dikurshëm është një objekt që merret dhe sundohet lehtë, duke patur përvojën, madje edhe mentalitetin e dikurshëm osman, të trashëguar në gen.
Mendoj se ne ende nuk kemi shpëtuar nga mentaliteti tipik komunist, kur çdo kovaç mund të bëhej sekretar partie dhe drejtor, ku çdo karrocier mund të bëhej kryetar i komitetit ekzekutiv, ku çdo marangoz mund të bëhej ministër etj.
Ne ende nuk kemi shpëtuar nga mentaliteti dhe psikologjia e turmës, ku i gjithë populli është ushtar, i gjithë populli është shkrimtar dhe për rrjedhojë i gjithë populli mund të jetë kryetar apo këshilltar.
Është krizë identiteti kur mësuesi nuk ndihet mirë si mësues, inxhinieri si inxhinier, mjeku i plotësuar si mjek, marangozi nuk ndihet vërtetë marangoz i nderuar kur këpucari nuk ndihet si i tillë, kur fermeri të dojë dhe të lëvrojë tokën dhe të rrisë me dashuri bimët. Me një fjalë pak, fare pak, dëshirojnë të marrin teserën e anëtarit të popullit profesionistit të vërtetë të qytetarit, për të cilin ka vërtetë nevojë ky vend.
Yzedin Hima

Lajmetari: 27.11..2006. |top | Commente | Printo